Shillong, Lber, 11: Ki bahaing hasem ki la pynpaw ba kim lah satia ban pdiang ia ka jingshah kynnoh jong u Bah Tarson Lymba ba u dei uba donkti ha ka jingbthei u bom IED ha Them Iewmawlong ha ka sngi Saitjain ka taiew baladep ha ka por kumba 10:30 baje mynmiet.
U Bah Bnai Syngkrem uba dei u pyrsa jong u Bah Tarson ha ka jingiakren bad ki lad pathai khubor hadien ka jingiakynduh ia u Superintendent of Police jong ka East Khasi Hills u Rituraj Ravi ryngkat ka jingsynran lang jong ki nongialam ka HNYF u la ong, “hynnin (sngi u Blei) ha ka por 12 baje mynsngi katba nga dang mut ban leit sait kali la poi ka phone na Dawki Police Station ba ki Pulit ki la phah wan u Bah Tarson sha Police Station bad mar mar ngi la leit synran lang sha Dawki PS bad lai ngut kiwei pat”
“Ngi shong ha ka kali bad u bah Tarson u rung shapoh (Thanat) bad ki kylli jingkylli ia kane ka jingjia (ba bthei u bom IED ha Them Iewmawlong),” ong u Bah Syngkrem.
U la ong ba ha kine ki ar lai sngi shwa ban jia ka jingbthei bom ha Them Iewmawlong, u Bah Tarson u don hapoh shnong.
“Ngi la poi ha Dawki PS ha ka por 5:00 baje janmiet bad ngi la ap hapoh thanat tad haduh ka por 7:30 baje janmiet ynda la wan poi ki Pulit na Shillong. Ki shong tang paramaki bad hadien kata, ki wan ong (ia u Bah Tarson) ba yn hap rah ia phi ban kylli jingkylli namarba phi don ha ka jingiakren iasuk (ka HNLC bad ka Sorkar),” ula ong.
“Dei ha ka por kumba 10:30 baje ne 10:45 baje mynmiet ki Pulit ki rah ia u. Ki Pulit ki shu batai tang ia ka jingbthei bom bad ban kylli jingiakyli namarba ma u ruh u dei uba don bynta ha ka jingiakren iasuk (ka Sorkar bad ka HNLC),” iathuh shuh shuh u Bah Syngkrem.Haba kylli, u la ong, “katkum ka jingiohi jong nga u Bah Tarson um don bynta eiei. Hynrei ia kaei kaei (kaba don shalyndet) ngim lah ban pynshisha. U trei u ktah hi kumba bylla ma ngi. Kum u pyrsa nga sngew duhnong khlem da tip thikna ban shu kem ka long kaba eh. Haduh mynta ban pyshisha ia u ba u donkti ha kato ka bynta kam dei kaba suk bad ban shu pharep khlem daw.”
