Shillong, Nailur, 05: Ka North-Eastern Regional Agricultural Marketing Corporation (NERAMAC), ka Central Public Sector Enterprise hapoh ka Tnat Development of North Eastern Region (DoNER), Sorkar India ka la pynlong ïa ka prokram kaba ar sngi ba la tip kum ka “Jingkyntiew ïa ka jingpynmih ïa ki Krai ha India ” kaba la sdang ha Meghalaya Rongali Bihu Auditorium, Shillong mynta ka sngi. Ka jingthmu jong kane ka prokram kalong ban ai jingtip bad kyntiew ïa ki jingmyntoi ba ïoh na ka jingbam ïa ki krai ban wanrah ïa ki jingmyntoi kiba wan na ka jingkiew ka jingseisoh na ka kam ki nongrep.
U Bah B K Sohilya, Adviser cum Chairman, Meghalaya Farmers Empowerment Commission haba ai jingkren ïa ki nongrep bad kiba don bynta ha kane ka kam u la ban jur ïa ka jingdonkam ban don ka jingai jingtip halor ka jingkongsan ka jingpynmih ïa ki krai. U la ong ba u krai u long u mar bam ba bha bad ba dei ban pynïaid iew ïa u kum u mar ba bha khnang ban ïoh jingmyntoi ki nongrep. U la ïaroh ïa ki sienjam ba la shim da ka NERAMAC bad kyntu ka jingïasohlang hapdeng ki kynhun ban pynlong ïa kane ka kam kaba jop.
U Commodore Rajiv Ashok (Retd), Managing Director, NERAMAC u la kren shaphang ki jingmyntoi jong ki krai bad ki daw ban pyndonkam ïa ki ha ka jaka jong ka ja. U la kren ruh shaphang ka jingtrei borbah ka Sorkar India na ka bynta ki krai ha kine ki snem ba la leit kaba la ïalam sha ka jingithuh ka pyrthei ïa ka kum ka International Year of Millets.
U M Iboyaima Meitei, Horticulture Adviser, NEC, u la ïaroh ïa ka sienjam ba la shim da ka NERAMAC ha ka kam rep bad Horticulture bad khamtam ka jingkyntiew ïa ki krai. U la ong ba ka jingpyntreikam ïa ka FPO ka skhim jong ka sorkar pdeng da ka NERAMAC la leh ha ka rukom kaba lah ban pynbud da kiwei kiwei. U la ong ruh ba ka NEC ka kyrshan pura ïa ki jingpyrshang ha kane ka kam.
U Kayio Kayina, MD NERCORMS, u la ong ba ki krai ki ju long shi bynta ka bam jong ki longshuwa jong ngi bad kumta kalong kaba kongsan ban pynneh bad kyntiew ïa ka na ka bynta ka jingshngain ka jingdon bam, ka jingbun ki mar rep bad ka jinglong tynrai jong u ha ka jingpynbiang ïa ki jingdonkam jong ka met.
Ka Kong J C Lyngdoh, Director jong ka Tnat ka rep ka riang, Sorkar Meghalaya ka la ong ba ka jaka ba thung ïa ki krai watla ka duna hynrei la kyntiew ha kine ki snem bad ka sorkar jylla ka trei ha ka rukom Mission Mode ban pynthikna ka lawei kaba ïaineh ha ryngkat ki krai.
Ha kane ka sngi la pyni ïa ki mar ba la shna na u krai kiba la buh ha ki stall. Ki nongseng kam lajong ki la pyni bunjait ki mar ba kynthup ki khaw krai, ki mar bam ba la pynkhreh ban shet. Ki mat ba kongsan jong kane ka prokram ki kynthup ïa ki mar ba la pynkhreh ban shet kum u Millet Malt, ki biskit, ladoo, millet rusk, ragi namkeen, ki kpu, ka wine bad kiwei kiwei.
Ki Nongshah khot sngewbha ym tangba ki la ïapbieit ïa ka jingbun lad ban pyndonkam ïa ki jingbam thiang ba shna da ki krai hynrei ki la pynpaw ka jingkwah ban tip shuh shuh shaphang ki mar bam ba la khreh ban shet ban kynthup ha ka bam jong ki ba man ka sngi.
Ha kane ka prokram la sakhi ka jingïashim bynta kumba 200 ngut ki nongïoh jingmyntoi, ba kynthup ïa ki nongrep krai bad ki nongseng kam lajong na Meghalaya, Assam & Arunachal Pradesh. Ïa kane ka prokram la kyrshan da ka Tnat ka rep ka riang bad ka bha ka miat jong ki nongrep, Sorkar India.
