Shillong, Rymphang, 24: U Myntri Rangbah ka jylla u Conrad K. Sangma ha ka Sngi Saitjaiñ u la plie ïa kiba bun ki project ha Babadam kaba ha West Garo Hills ha ka jingdonlang u Lamphang ka Ïingdorbar Thaw Aiñ u Thomas A. Sangma bad u Myntri ka tnat PHE u Marcuise Marak.
Ïa ka Garo Hills Agro Food Park kadei kaba la sdang da ka All Garo Hills Multi Purpose Cooperative Society (AGHMPCS) ba la ïalam da u Fr. Sunny Mavelil. Ïa kane ka park la bei tyngka pura da ka sorkar jylla ha ka jingmang kaba T. 15.73 klur kaba kynthup ïa ka Mustard Processing Unit, Cashew Processing Unit, Hi-Tech Food Lab, Ginger Processing Unit, Solar Power Plant bad 25 tylli ki Cold Storage Unit.
Haba kren ha ka jingïalang u Myntri Rangbah u la ong, “Ka sorkar jylla ka la buh ïa ka thong ban kyrshan ïa ki nongrep kiba trei ha ki kam rep bad kaba kynthup ïa ha ka kam horticulture. Ha baroh kawei ka jylla ka sorkar ka la pyntur shakhmat ha kaba ïadei bad ki kam thung jingthung na ka bynta ba kin ïoh ïa jingpynmih kaba bha, ka jinghikai ha ki rukom song ïa ki, ki kam ka jingshong dor bad ki kam ba ïadei bad ka ïew ka hat ïa ki jingpynmih jong ki”.
U la ïaroh ïa ka cooperative society ba la ïalam da u Fr. Sunny ban kyntiew ïa ki kam sengkam lajong lyngba ka rep ka riang.
Ka jingplie ïa ka Agro Food Park kaba thymmai kan shna kumba 100 MT jong ki mar ba la pynmih ki bym pat saiñ, kynthup ïa u sying, bad kiwei ki mar rep.
Haba kren halor ka jingtuklar ka sorkar ban pynïoh nong khambun ïa ki nongrep ha ka jylla u Conrad u la ong, “Ha ki 6 snem ba la leit ngi la buh ïa ki 166 tylli ki processing unit, 154 tylli ki warehousing facility bad 34 tylli ki cold storage sha ki jaka ba kyndong jong ka jylla”.
U la ong ba ïa ki Integrated Village Cooperative, ki Farmer Producer Organisation bad ki Women collective la pynshlur bad kyntiew da ka sorkar ban thaw ïa ki lad ban kyntiew ïa ka ïoh ka kot ha ki thaiñ nongkyndong, ki la don katto katne ki processing unit jong ngi ki la long kiba bha bad biang bha ha baroh kawei ka thaiñ shatei lammihngi,” u la ong.
Da kaba ong ba lah jan T. 357 klur la buh ïa ki kam pynroi kiba shongdor ha ka jylla, u la ong, “Ka sorkar kan pynkhlaiñ ïa ki jingtrei kiba la don bad ban pynlut ruh ha kiba thymmai ban ïoh ïa ka thong ban kyntiew ïa ka ïoh ka kot kaba arshah jong ki longïing ki nongrep kiba don kumba 4.5 lak ki longïing”.
U la pynpaw ïa ka jingkyrmen ba ka Agro Food Park ha Babadam ka la long kum ka model kaba la ïoh jingjop ka ban long ka nuksa sha kiwei pat ki bynta ka jylla. U la ong ruh ba kin sa don ki prokram bapher bapher bad ki tour ki ban sa pynlong da ka sorkar ba kin ïa ïoh jingtip bad ban tip ruh na iwei ïa iwei pat
U Myntri Rangbah u la plie ruh ïa ka Arecanut Processing unit bad u la buh ïa u mawnongrim na ka bynta P.A. Sangma Shopping Complex ha Babadam.
U MLA Arbinstone Marak bad u CEM GHADC u Albinush Marak ki la donlang ha ka prokram plie ïa kitei ki projek.
