Shillong, Rymphang, 24: Ka jingjia kaba i triem ka la jia ha ka miet 20 tarik, Rymphang 2024 ha ka shnong Urkaliar, Shillong ha kaba ka la mih ka jingïashoh ïadat kaba shyrkhei bha kaba la poi haduh u pud ba ki ar kynhun ki la sei da ka tari ban ïa dung.
U Secretary jong ka shnong Urkaliar Bah Samborlang Diengdoh ha ka jingïakren bad ki nonglum khubor u la ïathuh ba kane ka jingjia ka la mih na ka daw ka jingïakput hapdeng ki ar kynhun.
Hadien kane ka jingjia ka bor synshar shnong jong ka Dorbar Shnong Urkaliar ka la lum jingïalang ïa ki trai jaka bad ïa ki trai iing kiba ju ai wai iing ne ai wai dukan ha kane ka shnong.
Ha ka jingïalang ka Dorbar Shnong bad ki trai ing bad ki trai dukan ki la shim ïa ka rai ba kin ym aiwai shuh ïa ki dukan ha ki briew kiba die ïa ki jingdie kiba ka Sorkar ka la ñiew ba ki long be-ain ne kiba ju die kyiad tuh ha ka por mynmiet.
Ka Dorbar Shnong ka la rai ruh ban phah khang khyrdep ïa ki baroh ki dukan ha ka shnong Urkaliar naduh ka por 10:00 baje baje mynmiet katkum ka hukum ba la pynmih da ki bor synshar ka East Khasi Hills District.
“Ngi la pynmih da ka jingbthah sha baroh ki nongshong dukan ba ki dei ban khang khyrdep ïa ki dukan jong ki naduh ka por 10:00 baje mynmiet bad ha kajuh ka por ki nongbuh dukan ki dei ban buh ruh ïa ki CCTV Camera hakhmat ki dukan jong ki bad ba ki dei ban pyntip sha ki bor pynïaid shnong ne sha ki bor jong ka aiñ lada ka don ka jingpynkheiñ aiñ kata lada ka jingïadie ïathied ka dang bteng hadien ka 10:00 baje mynmiet,” la ong u Bah Diengdoh.
