Shillong, Nailar 28: Ka Joint Action Committee jong ka Khasi Jaintia Fresh Vegetables Ginger Trader Association (KJFVGTA) ha ka Lah Sngi U Blei ka la leit ban iakynduh ia u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ban pan jingpynshai halor ka jingpynbeit thymmai ia ka aiñ Khasi Hills District Autonomous District (Establishment Management and Control of Market) (2nd Amendment,) Regulation Act 2021.
Ha ka jingiakren bad ki lad pathai khubor u Chairman jong ka Committee u la iathuh ba kum ki nongkhaii kim pat shai bha halor kane ka Aiñ jong ki nongrep ba la shna da ka District Council halor ka jingbym shah shuh ban dang ot kilo ia ki mar rep.
U la ong ruh ba ki nongkhaii ki don bunbah ki jingeh bad iathuh ruh ba kin sa ai da ka jingthoh kaba biang ban pynpaw ia ki jingeh jong ki nongkhaii sha ka KHADC khang ba ka Council kan dup shimkhia ia ka jingeh jong ki nongkhaii.
“Ka jingeh ki nongkhaii lada ym shah shuh ban ot kilo ka long namar ba tengteng ki nongrep ki thep lang ia ki marrep kiba pyut bad babha hynrei ngi ki nongkhaii ngi hap ban shim la ka shim, hynrei lada ym shah shuh ban ot kilo, kan buh jingeh ia ki nongkhaii kiba hap ban jied bad buh briew ban jied,” u la ong.
Hynrei na ka liang ki nongkhaii ki kwah ban don ka jingiasngewthuh jingmut bad ki nongrep.
La iathuh ba Chief Executive Member jong ka KHADC u Bah Pyniaid Sing Syiem u la kular ban shimkhia ban peit lang ruh ia ka jingeh jong ki nongkhaii.
Takraiñ u nongkhaïi ïa ka HFU: Uwei na ki nongkhaii ia uba tip kyrteng kum u Bah Henry Dkhar u la takrain tyngeh ia ka Hills Farmer Union (HFU) da kaba ong, ba kam dei satia ban mushlia ha kaba iadei bad ka kam hapdeng ki nongkhaii bad ki nongrep namarba kane ka ktah hi ia ki nongrep salonsar.
U la ong ba ki nongkhaii ki kwah ban iashai hi tang bad ki nongrep lada ot ne ym ot kilo shuh ia ki marrep bad ia kane ka kam yn sa iakren pynbeit hi da ki nongkhaii bad ki nongrep hynrei ym da ki nongrep kiba shong ha ka shuki.
