Shillong, Nailur 01: U MLA jong ka Pynthorumkhrah u Bah Alexander Laloo Hek uba long ruh u Myntri ka Sorkar Jylla ha ka sngi thohdieng u la ong ba u dei u nongshong shnong jong ka Refugee Rehabilitation Colony bad u ïoh ruh ïa ka Residential Certificate na ka RR Colony Welfare Society.
“Lada (ka KHADC ka kwah) nga long uba kloi ban ai jingpynshai bad nga dei u nongshong shnong jong ka RR Colony bad ïa ka Residential Certificate la ai sha nga da ka RR Colony Welfare Society,” ong u Bah Hek ha ka jingïakren bad ki lad pathai khubor.
Kane ka jingkren jong u Bah AL Hek ka long hadien shi sngi ba ka Khun Hynñiewtrep National Awakening Movement (KHNAM) ka la kyntu ïa ka Khasi Hills Autonomous District Council (KHADC) ban pan jingpynshai na ki arngut ki MLA ka BJP, kata na u Sanbor Shullai (uba long u EM in-charge Trade ha u snem 2007) bad na u Bah AL Hek, halor kano ka bor ba ki la thung Rangbah Shnong da u bym dei u Khasi bad aibor ia kiba buhai shnong ha RR Colony ban pynïaid la ka jong ka synshar ka khadar.
Kane ka la jia ruh hadien ba ka Hynñiewtrep Integrated Territorial Organization (HITO) ka la lap ba la ai ïa ka Trading Licence da ka KHADC halor ka NOC ba la ai da ka Society jong ka RR Colony ba la soi da u Rangbah Shnong bym dei u Khasi.
U Chief Executive Member jong ka KHADC u Bah Pynïaid Sing Syiem u la maham da kaba tyngeh ïa ka RR Colony Welfare Society ba kam donbor eiei ruh em ban ai ïa ka No-objection Certificate (NOC) lane ka Residential Certificate sha ki bym dei ki Khasi kiba buhai shnong ha kane ka jaka.
Haba kylli, u Bah Hek u la ong, “ngim lah ban leh eiei shaphang kata lada ka District Council ka ithuh tang ïa ki Dorbar Shnong (ym ïa ka Welfare Society).”
“Ngam lah ban ong la ka (RR Colony) hap ne em hapoh ka jingpeit jong ka Dorbar Shnong Rynjah. Hynrei katkum ka jingsngewthuh jong nga, mynshwa ki tyrwa ban don hapoh ka Dorbar Shnong Umpling hynrei ki kyntait namarba ki ong ba ka dei ka ktem sah ki phetwir. Hadien kata, ki la ïakren ruh ban hap hapoh ka Rynjah, hynrei ki la shah kyntait. Shaei kin leit bad ki la thaw la ka jong ka Welfare Society ban ïada ïa la ki jong ki nongshong shnong,” u la ong bad bynrap, “ka long thik kum ka Jail Road Welfare Society, ka Oakland Welfare Society, ka Bivar Road Society hynrei ki dei pat ki nongshong shnong jong ka jylla Meghalaya.”
“Lada nga dei u nongshong shnong jong ka RR Colony, balei ngan hap ban shim ïa ka Residential Certificate na Golflink. Kata ka bym lah ban long,” u la bynrap.
