Shillong, Lber, 22: Ka seng kieng atiar Hynniewtrep National Liberation Council (HNLC) lyngba u kyrwoh ba la phah da u General Secretary cum Publicity Secretary u Bah Sainkupar Nongtraw sha ki lad pathai khubor ha ka sngi Thohdieng ka la ong ba ladep ban ithuh durkhmat ia u briew uba donkti ha ka jingiap jong u Bah Cherishstarfield Thangkhiew.
Ha u kyrwoh, une u nongialam ka HNLC u la ong, ba u Pulit Ophisar uba donkti ha ka jingiap jong u Bah Cherish un sa mad ia ka jingeh bad byrngem ruh ba ka seng kan thwet bad kan sa pynshitom bad khrai khlieh ia u.
“Ki jingiaithok ba bunsien bad ka jingtrei shitom ki Pulit ban buhrieh ia ki jingshshisha ki dei ki sakhi, leh mynleh bym tip halor ka jingshisha ba pyrshang ban tep ia ka jingshisha,” ong u kyrrwoh ka HNLC.
Ha ka bynta kaba sdang jong u kyrwoh, ka HNLC ka la pynpaw ruh ia ka jingsngew lyngngoh ban lap ia ka jingkam jong ka tnat Pulit halor ka Audio Recording ba la kynnoh ba uwei u dkhot ba la shah kem jong ka HNLC u la iakren bad u Military Commander jong ka HNLC u Bah Sanbor Pala. Hato ka tnat Pulit ka mut ban ong ba u Bah Cherishterfield Thangkhiew u dang im? la buh jingkylli ka HNLC.
Ka HNLC ka la buh jingkylli ruh sa katno ngut ki mynsiem ba luilui kin kylla langknia ha ki ktang suloi jong ka tnat Pulit ka Jylla Meghalaya tang na ka daw ba la suba ba ki lah ban dei u Bah Sanbor Pala. Sa mano ban kylla langknia? Hato kin shu pynlong sohpdung ia ki nongialam sengbhalang da ka jingsuba ba dei u Sanbor Pala? Lada ki iohkem ia u Sanbor Pala shisha, ngin yn don jingiada ban len ia ka dur ba shisha jong u. Peit, kumno ki kem bym dei ia u Bah Tarzan Lymba halor ka jingsuba ba u dei uba donkti ha ka jingpynthei ia u bom IED, la ong ka HNLC.
Ka HNLC ka la ong, ba katkum ka Judicial Report 2022 jong u Justice (Retired) T. Vaiphei, ki Pulit ki la kam bad kynnoh ba u Bah Cherishterfield Thangkhiew uba la ai kyrteng ialade kum u Sanbor Pala, u dei uba donkti ban dawa pisa bad ban pynbthei ia u bom IED. Kane ka pynmih ar tylli ki ishu: ka jingtlot ka tnat syntiat ki Pulit bad ka buit ban shukor ia ki paidbah, ia ki sengbhalang bad ia ki bahaing hasem jong u Bah Thangkhiew ba u Bah Cherishterfield Thangkhiew u dei u Sanbor Pala bad uba leh ia ki kam pyntriem ha ka kyrteng sin Sanbor Pala. Ka jingpyniap ia u Bah Cherishterfield Thangkhiew halor ka jingkynnoh ba u iakhun la ngeit ba ka dei ka jingiasylla hapdeng katto katne ngut ki Myntri jong ka Sorkar MDA, la kynnoh shuh shuh ka seng HNLC.
Ha kaba iadei bad ka jingkynnoh ba ka HNLC ka la ialam bakla ia ki samla da kaba pynbiej ban ai jingmyntoi bad ban ai kali, ka HNLC ka la kynthoh kylla da kaba ong ba ka Sorkar Pdeng bad ka Sorkar Jylla ki la ai khusnam ia ki Pulit Ophisar bad ia ki shipai kiba donkti ban pyntyrha, ban pynshitom, ban pyniap, ban set byndi ia ki nongialam riewlum bad ia ki riew paidbah ba luilui da kaba ai pisa, pynkiew kyrdan, ai ribon, ai medal, bad kiwei kiwei ki khusnam.
“Ki samla Hynñiewtrep ruh ki dei hok ban ioh khusnam na ka jaidbynriew lane na ka HNLC lada ki iakhun bad pyniap ia ki nonglehbor kiba long ka jingma ia ki briew bad ia ka ri jong ngi. Ka HNLC ka iaroh ia ki samla kiba len lade monsngewbha na ka bynta ka jaidbynriew lajong. Ki ieng ban iakhun pyrshah ia ki Pulit, kiba buh shwa hakhmat eh ia ka bha ka miat jong ki briew ki bym dei ki riewlum,” la ong ka HNLC.
Shuh shuh ka HNLC ka la kynthoh ruh ba bun na ki Ophisar Pulit Khasi ha ka tnat Pulit, kum ka Kong Claudia Lyngwa bad u Bah Vivek Syiem, ki dei tang ki ophisar khun shipiah kiba buhrieh ia ka dur ba shisha jong ki ha lyndet ka dur ba paw jong u Hynniewtrep.
