Shillong, Lber 22: Ka kyrtong jong ka National People’s Party (NPP), Dr. M Ampareen Lyngdoh ha ka sngi thohdieng ka la thep kyrteng ban iakhun ia ka elekshon Lok Sabha ka ban sa long ha ka 19 tarik, Ïaiong mynta u snem.
Ia ka Dr. Ampareen kaba dei ruh ka Myntri jong ka Sorkar Jylla la synran lang da ki nongkyrshan kiba la mih da ki hajar ngut ban ïaid kjat na ingsah jong ka na Laitumkhrah terter bad leit leh burom ia u mot sah nam jong u kpa jong ka, u Bah PG Marbañiang uba dei ruh u MP barim ka Shillong ha ki snem 1989 haduh 1996.
Na Laitumkhrah, ka Dr. Ampareen bad ki nongkyrshan ki la hiar sa sha ophis treikam jong ka NPP ha Lower Lachummiere ryngkat ka khor ka khriam bad ka risa ka kynhoi.
Ha ka por ba la thep kyrteng hakhmat u Returning Officer ha ophis u Deputy Commissioner ka East Khasi Hills, ïa ka Dr. Ampareen la synran da u State President ka NPP Bah Prestone Tynsong, u National General Secretary ka NPP Bah Sniawbhalang Dhar kiba dei ki Symbud Myntri Rangbah ka jylla, u President ka NPP East Khasi Hills Bah Gavin Mylliem, Bah Comingone Ymbon Myntri Sorkar, Bah Banteidor Lyngdoh, Bah Wailadmi Shylla, Kong Santa Mary Shylla, Bah Pynïaid Sing Syiem, Bah Fantin Lakadong, Bah Carnes Sohshang, nalor ki nongkitkam ka party kynthup naduh u Working President Bah Hamlet Dohling, Bah HM Shangpliang, u Secretary ka NPP East Khasi Hills Bah Aibor Tynsong bad kiwei kiwei.
Ka Dr. Ampareen Lyngdoh haba kren sha ki lad pathai khubor hadien ba ladep thep kyrteng ka la ïathuh, naduh ka sngi ba ka party ka jied ïa ka kum ka kyrtong ka la leit jngoh kylleng ki Constituency ban lum jingïalang bad kynduh ruh ïa ki paidbah.
“Nga sngewkmen ba haduh mynta ka sngi nga la dep ban leit jngoh ia baroh 36 tylli ki Constituency bad nga la ïoh ruh ïa ka jingkyrkhu na baroh ki Constituency jong ka Shillong Parliamentary Seat,” ong ka Dr. Ampareen.
Haba kyntait ban kren eiei pyrshah ïa ki kyrtong kiba ïakhun pyrshah, ka Dr. Amapareen ka la ong, “ai ba kiwei kin kren katba ki mon hynrei kan ym pynsngew bad kan trei beit ïa ka kam ban poi sha ka thong.”
Ka la pynpaw ia ka jingsngewkmen ba ka ïoh mihkhmat kum ka kyrtong na ka NPP kaba iatreilang bad ka BJP kaba ialam ia ka Sorkar ha Delhi.
U Returning Officer jong ka Shillong Parliamentary Seat u la pyntip ruh ba u Bah Peter Shallam u la thep kyrteng kum u kyrtong shimet ha kane kajuh ka sngi.
