Shillong, Lber, 22: Ka Bharatiya Janata Party (BJP) ka la kyntait ban ai tiket ia ki kyrtong kiba tyrwa ban iakhun ia ka elekshon Lok Sabha 2024 ha Meghalaya, kata, na Shillong bad na Tura Parliamentary Constituency.
Ka BJP ha ka sngi Thohdieng ka la pynmih ia ka rai ban kyrshan tylli ia ka National People’s Party (NPP) ha Shillong bad ha Tura ban ioh ia ka jingjop.
La pyntip ia kane da u nongaiktien ka BJP na Delhi Sambit Patra uba ong, “katkum ka jingbthah jong u National President u J.P Nadda, ka BJP kan kyrshan ia ki kyrtong ka NPP ha Meghalaya, kata ha Shillong bad ha Tura Parliamentary Seat.”
Ha u kyrwoh ba la pynmih ha ka Twitter , u Patra u la ong, “katkum ka jingbthah jong u National President ka @BJP4India, Shri@JP Nadda Ji, nga sngewbha ban pyntip ba ka BJP kan ai ka jingkyrshan ia ki kyrtong ka NPP ha baroh artylli ki Seat ka Meghalaya (Shillong bad Tura).”
U la pyntip ruh ba ka BJP kan kyrshan ia ka NPF ha ka Outer Manipur Constituency bad ia ka NDPP ha Nagaland ha ka Elekshon Lok Sabha 2024.
Ka Bharatiya Janata Party (BJP) ka dei ka paralok kaba iatreilang hapoh ka Sorkar MDA-2 ba ialam da ka NPP ha Jylla Meghalaya bad ka NPP ka dei ka paralok kaba iatreilang ha ka Sorkar National Democratic Alliance ha Delhi ba la ialam da ka BJP.
Kum ban shu pyntip hangne, ba ka BJP Meghalaya State Unit ka la phah 11 tylli ki kyrteng sha Delhi, kiba la tyrwa ban iakhun na ka tiket jong ka BJP ha ka elekshon Lok Sabha ha Shillong bad Tura Parliamentary Seat.
Napdeng kine ki 11 ngut, san ngut ki dei kiba ka party ka la phah ia ki kyrteng kiba tyrwa ban iakhun na Shillong Seat ba kynthup ia u Myntri Sorkar Bah Alexander L. Hek, ka Dr Fenela Lyngdoh Nonglait, u President barim ka BJP Bah Ernest Mawrie, u President ka BJYM Bah Mewaker Lyngdoh bad ka Kong Sumitra Laloo.
Na Tura Seat, kiba pan tiket ki long u u MDC ka Tura Bernard N. Marak, u MLA barim Winnerson D Sangma bad u KC Boro, u MDC barim u Boston Marak, ka Riya Sangma bad u Thomas Marak.
