Shillong, Rymphang, 9: U Deputy CEM ka Khasi Hills Autonomous District Council (KHADC) Bah PN Syiem ha ka sngi Thohdieng ula ong ba ka Council hadien habud kan sa wanrah noh da ka Khasi Hills Autonomous District Council Heritage and Cultural Conservation and Promotion Bill ban ïoh ban pynlong noh ka Monolith Festival manla u snem.
Ïa kane u la ong ha ka jingïalang kaba lyngkot hapoh Conference hall ka KHADC ha shwa ban pyllait paidbah ïa ka Theme song jong ka Monolith Festival bad ïa ka media Campaign Vehicle ne ka kali ka ban leit pynbna shaphang kane ka Festival, ha ka jingïalang kaba la long ha District Council.
U la ong ba ïa katei ka Bill na ka liang ka EC ka la don ha ka jingmut ban shen yn sa draft bad yn sa wanrah ha ka por kaba biang.
Haba kren ha ka jingïalang ula ong ruh ba ka Festival kadei ban pyninam ïa ka jinglong tynrai u Khasi ha ka rwai ka siaw, ka tem ka put, ka bam bad ka riam tynrai.
Ula ong ba ka Council kan sa shong pyrkhat ban pynlong man la ka por ïa ka Monolith Festival ha Khasi Heritage Village, Mawphlang bad yn pynkhreh ruh ïa ka Bill ba kan dei ka kamram ïa ka Executive Committee jong ka Council ba kin pynlong beit ïa kane ka Festival man la u snem.
Ha kane ka jingpyllait ïa Theme Song bad ïa ka Kali ai jingpynbna, la ïadonlang ki Executive Member kiba kynthup ïa u Bah Gigur Myrthong, Bah Victor Ranee, Bah Teibor Pathaw, Kong Grace Mary Kharpuri, Kong Macdalyn Sawkmie Malong, Bah Rangkynsai Kharbuki, Bah Fantin Lakadong Bah Carness Sohshang bad kiwei kiwei ha kaba la ïadonlang ruh ki ophisar jong ka Council.
Ka Monolith Festival kan sdang ha ka 22, 23 bad 24 tarik u Rymphang mynta u snem bad ïa kane ka tamasa yn pynlong da ka KHADC ryngkat ka jingïatreilang bad ka tnad Tourism, ka Meghalaya Age Limited jong ka sorkar jylla.
La pynlong ïa ka Monolith Festival nyngkong eh ha u snem 2013 bad ha ka sien ka baar ha u snem 2016 bad kane kaba mynta ka kynti kan dei ha ka sien kaba lai.
Lah ong ba ha kane ka Monolith Festival kaban ong ka Council kan ai kyrpad ruh ïa ki shnong ban pynbna ha ki tynghung ha manla ki shnong khnang ba ki briew kin ïoh jingtip bad ban wan ïashimbynta.
Ïa kane ka festival ha ka sngi sdang kan long ha ka shiteng sngi ban wan plie da u Symbud Myntri Rangbah u Bah Prestone Tynsong bad ha ka sngi kut yn wan u Myntri Rangbah u Conrad Sangma ha ryngkatlang bad u Myntri ka tnat Tourism u Bah Paul Lyngdoh.
Ha ka sngi sdang yn don ki workshop jong ki khynnah skul bad ha ki sngi ba bud yn sa khambun ki prokram.
U la ong ban pyrshang ban kham pynpher mynta u snem ha kaba ki kolshor ba la leh da kiba bun ki Hima yn sa wanrah ha kitei ki sngi.
Ïa kane ka tamasa yn pynïaid da ka Coordination committee on Monolith Festival ha ka jingpeit khmih jong ka kynhun ba la ïalam da u Bah Alan West bad u Professor Desmond Kharmalki kum ki dkhot.
U Bah P N Syiem u la wer ïa ki paidbah ban wan sha katei ka tamasa Mawbynna kaba laisngi khnang ba kan long kaba jop namar ha kane ka tamasa yn ym shim bai rung bad ka la don ruh ka jaka ïeng kali kaba heh bad ka rukom rung rukom mih ki kali lah dep ban pynbeit khnang ban pynduna ïa ka dheng kali.
