Shillong, Rymphang, 9: Ka Hynñiewtrep Youth Council (HYC) ha ka sngi Thohdieng ka la dawa ïa u Director jong ka NEIGRIHMS u Prof. (Dr.) Nalin Mehta ba u dei ban bud ryntih ïa ka bhah thungkam kumba la mang da ka Sorkar Kmie.
Ka Seng ka la pynpaw ïa kane ka jingdawa hadien ba u Mehta u la khot ïakren biang ha ka sien kaba ar hadien ba ka seng ka la buh ïa kiba bun ki mat jingdawa ha kaba ïadei bad ka thungkam ka thungkam ïa ki trai ri trai muluk hapoh NEIGRIHMS Hospital.
Ha ka jingïakren bad ki lad pathai khubor hadien ka jingïakynduh ïa u Metha, u President ka HYC u Bah Roy Kupar Synrem u la ïathuh ba ki don kumba saw ne san tylli ki mat jingdawa kiba ka seng ka la buh ïa kiba la mynjur da u Director.
“Kawei na ki jingdawa jong ka seng kaba ngi la pynsngew halor ka post Nursing Officer ba ka NEIGRIHMS ka la pynlong ïa ka eksamin lyngba ka NORCET kaba wanrah ïa ka jingduhnong ïa ki samla thepkam trai jylla. Kumba ngi la lap na ki 222 tylli ki post ba ka NEIGRIHMS ka la thungkam ha ka post Nursing Officer ki don 201 ngut ki shynrang bad 21 ngut ki shynrang bad tang 14 ngut ki dei ki trai jylla jong ngi. Ngi la dawa ïa u Director ba un pynsangeh ïa ka NORCET Examinations bad mynta ka sngi ula kohnguh ban pynsangeh ïa ka jingthungkam katba ym pat lah ban pynbeit ïa ka jingbakla,” la ong u Bah Synrem.
U la ong ruh ba ka seng ka la dawa hakhmat u Director ba ka NEIGRIHMS ka dei ban pyntreikam ïa ka 80 percent na ka 100 percent kumba leh da ka AIIMS. “Hynrei ka NEIGRIHMS kam shym la leh ïa kata. Kine ki shynrang kiba ka AIIMS kam shym la pdiang, la shu wan bret ha NEIGRIHMS,” la kam u Bah Synrem.
“Katba u Director um pat lah ban pynbeit ïa ka 80 la 20 percent, kata, 80 percent ki kynthei bad 20 ki shynrang ka NEIGRIHMS kam dei ban thungkam ïa ki Nurse. U la ong ruh ba ka NEIGRHIMS kan sa thoh sha ka Ministry of Health and Family Welfare ka Sorkar India ba kin ym pynlong shuh ïa ka eksamin thungkam lyngba ka NORCET,” la ong shuh shuh u Bah Synrem bad bynrap ruh ba u Director u la kohnguh ban pynsagneh shipor.
Ha kaba ïadei bad ka jingaiwai ïa ki kam ne ki Outsourcing Agency hapoh ka NEIGRIHMS, u Bah Synrem u la ong, “ba ki Outsourcing Agency bad ki nongtrei kiba trei hapoh ki Agency ki dei ban long kiba napoh ka jylla Meghalaya,” bad bynrap ba u Director u la pdiang ïa kane ka jingdawa.
“Ngi la kren da kaba shai lada ka NEIGRHIMS ka wanrah da ki Outsoursing Agency kiba nabar bad ki briew kiba nabar ban trei hapoh ki Outsourcing Agency ngin ym lah satia ban pdiang hynrei u Director u la pynthikna ba ka NEIGRHIMS kan pdiang beit ïa ki Outsourcing Agency bad ïa ki nongtrei trai jylla.
Halor ka post Group C ka seng ka la dawa ban thungkam ïa ki trai jylla. “U Director u la pynshai ba ka NEIGRHIMS ka bud ïa ka office memorandum ba la pynmih da ka Sorkar Pdeng kaba long 44% na ka bynta ki Scheduled Tribe,” la ïathuh u Bah Synrem.
“Ngi la banjur ïa u Director ba u dei ban bud ryntih ïa ka office memorandum bad ngi la kren ruh da kaba shai ba ym dei ban thung ïa ki ST kiba nabar ka jylla hynrei ïa ki ST kiba na kane ka jylla Meghalaya,” u la ong.
“Ngi la ïakren ruh halor ka jingkhot Advertisement jong ka NEIGRHIMS ha u snem 2022 kumba 80 tylli ki post. Ka jingpynlong eksamin ka ladep bad ka Skill Test hynrei haduh mynta kim pat thungkam. Kawei na kita, ka dei ka Diet Clerk. Ngi la pan jingpynshai halor kane. Ym tang katta ki (NEIGRIHMS) pynlong eksamin na ka bynta ki post ki bym don shuh bad ngi la dawa ïa u Director ba un thoh sha ka Sorkar Pdeng ban pynim biang ïa kine ki post bad u Director u la ïathuh ba u ladep phah ïa ka jingthoh sha ka Ministry kaba la bthah ïa ka NEIGRIHMS ban leh ïa ka Revive Guidelines bad kumno ban pynim biang ïa ki post. Ha ka taiew ban sa wan, kan sa phah ïa ka Revive Guidelines sha ka Sorkar Pdeng,” la ïathuh shuh u President ka HYC.
