Shillong, Rymphang, 9: U Myntri Rangbah ka Jylla u Conrad K Sangma ha ka sngi Thohdieng u la ïaiban ba ka Sorkar Jylla ka long kaba kloi ban ïakren bad ka seng kieng atiar Hynñiewtrep National Liberation Council (HNLC) hapoh ki kyndon ba la buh da ka Ministry of Home Affairs (MHA) ka Sorkar India.
U la Sangma u la kyntait ruh ban kynthoh halor u kyrwoh ba la pynmih da ki nongïalam ka HNLC bad ong ba ka Sorkar ka kyrpad ïa ka seng ba kan pynkylla biang ïa ka rai bad ban wan biang sha ka miej jingïakren ïasuk.
“Ngam tharai ba nga lah ban kynthoh khlem da ïohi ïa ka jingthoh (ba la phah sha ka Sorkar). Hynrei ngan ïai ban ba ngi long kiba kloi bad ngi kyntu ruh ïa ki ban pyrkhat bha ha kane ka kynti, ngi kwah ïa ka jingsuk kaba neh shi junom bad namarkata ngi kwah ban ïai ban ba ngi dei ban wan sha ka miej jingïakren sa shisien hynrei kumba nga la ong halor ka jingïakren bad ki lane ka jingphah ktien ngam pat ïohi satia ka jingthoh,” la ong u Sangma ha ka jingïakren bad ki lad pathai khubor.
Haba kylli, u Myntri Rangbah u la ong ba ka Sorkar ka la ïai ban ïa kajuh shi kajuh ba ki kyndon bad ki jingbthah ba la pynmih da ka MHA ki dei kiba hap ban bud na ka bynta baroh ki kynhun ïa kaba ka Sorkar India ruh ka kren ïa kata.
“Namarkata, kan hap ban bud ïa ki kyndon, ngim lah ban kiar na kata namarba kata ka dei kaba la bthah ïa baroh ki kam bad lada ki sdang ban pynkylla ïa kata tang na ka bynta kawei ne ki ar tylli ki kynhun, kin hap ban pynkylla lut ïa baroh. Hapoh ki kyndon jong ka MHA ngi long kiba kloi ban ïakren,” u la ong.
Ka HNLC ka la weng noh na ka jingïakren ïasuk bad ka Sorkar Pdeng bad Sorkar Jylla kum ka jingpyrshah halor ka jingbym lah jong ka Sorkar ban ai jingmynjur ïa ki san tylli ki mat jingdawa bahakhmat ba kynthup ïa ka jingmap ei ïa ki nongïalam bad ïa ki dkhot jong ka seng.
Shuh shuh u Sangma u la ong ka la don ruh ka rai ba la shim mynshwa ha kaba la weng noh ïa ki case.
“Hynrei kumba nga ong, lada yn hap ban leh ha ki sngi ban sa wan lane kam shong eh ha ki jait mukotduma hynrei lada phim lah ban sdang ïa ka jingïakren ngin ym lah ban poi sha kata ka thong,” u la bynrap.
