Shillong, Jymmang, 06: Kawei ka samla kaba dang pule ha ka Civil Engineering ha Shillong Polytechnic, Shillong kaba la tip kyrteng kum ka Diana Dimre Ch Marak, 24 snem ka rta ka la pynkut noh ia ka la jong ka jingim da kaba sdien phasi ialade da ka jaiñ Gamsha ha ka grill jingkhang iit jong ka Girls Hostel ha ka mala kaba nyngkong.
Kane ka samla ka dei na ka shnong Upper Babupara, Tura, West Garo Hills District. Kane ka la jia ha ka step Lah Sngi u Blei ha ka por kumba 2:00 baje mynstep.
Ia kane la lap da u Chowkidar uba peit ia ka Hostel kaba sah ki samla pule kynthei ha Shillong Polytechnic hadien ka jingwiar bad ka jingjlew jong ki ksew ha ka step Lah Sngi u Blei ha ka por kumba 2:00 baje mynstep
U Chowkidar uba ju ap pahara ia ka Girls Hostel u Bah Khrawkupar Suchiang ha ka jingiakren bad u nonglum khubor ka Batesi Tv u la iathuh ba u la kyndit naba ioh thiah hadien ba u la iohsngew ia ka jingjlew bad ka jingwiar jong ki ksew u la mih shabar ban peit hynrei kumba iuh tdong bseiñ, u la lap pynban ha ka mala kaba nyngkong ba ka samla Diana ka la sdien phasi pynban ialade.
Marmar u Bah Khrawkupar u la pyntip noh ia kane ka jingjia sha ka Warden jong ka Girls Hostel ka Kong Pynjainailang Garod ha kaba ka la pyntip pat sha ki Pulit jong ka Mawlai Police Station.
Ia ka met ba dang sah jong kane ka samla ki Pulit ki la pynkit noh sha Shillong Civil Hospital na ka bynta ban leh ia ka Postmortem shwa ban aiti noh sha ki bahaing hasem ban pyndep ia ka jinglehniam bakhatduh ha Tura.
U Director incharge Principal jong ka Shillong Polytechnic Bah WL Warjri u la pynpaw ka jingsngewsih halor kane ka jingjia namarba ka dei ka sien banyngkong eh ba kan wan jia kum kane ka jingjia bym poi pyrkhat ha kane ka shlem pule.
“Nga pynpaw ia ka jingsngewsih kaba khraw na ka liang jong nga bad na ka liang jong ka Institute ban duh ia ka mynsiem bakordor ha kane ka rukom ka long ka jingkthang kaba khraw. Ngim poi pyrkhat balei ine i khynnah i leh haduh katne ialade. Lada i don kano kano ka jingeh ba i shem ha ka jingshisha i la dei ban iathuh ia ngi, ia i Warder lane ia nga. Hynrei ngi la shu jingtip halor kane ka jingjia ngi sngewsih haduh katta katta,” ong u Bah Warjri.
“Ngi phah ia ka khubor sngewlem sha ki kmie ki kpa bad ki bahaing hasem kiba don jingiadei bad ine i khynnah,” la bynrap u Bah Warjri.
