Shillong, Nohprah, 09: Ka Bharatiya Janata Party (BJP) Meghalaya State Unit ha ka sngi Saitjaiñ ka la pyniasyriem ia ka Bamsap bad ka Congress ba ki long kumjuh.
Ki dkhot jong ka BJP ba la lamkhmat da u Chief Spokesperson u Bah M. Kharkrang ki la pynlong da ka jingiakhih hakhmat ka ophis treikam jong ka party ha nongbah Shillong ban pynrem halor ka jingkynnoh donkti ha ka jyrsieh bamsap da u MP jong ka Seng Congress na Jharkhand u Dheeraj Sahu.
“Nga ngeit ba phi la iohi lut haduh mynta ym pat lah ban ñiew ia ki pisa ba la ioh na ki ïing bad ki ophis jong u MP ka Jharkhand. Kane ka ddang dei tang kaba rit duh bad ki dang bun shuh kiwei kiwei (ki pisa bym pat ioh kurup) ong u Bah M. Kharkrang ha ka jingiakren bad ki lad pathai khubor.
“Haduh mynta ka pisa ka la poi 300 klur. Ka dei ka pisa jongno? Ka dei ka pisa u paidbah. Ngi wan hangne ban pynrem ia ka kam bamsap jong ka seng Congress kaba iatakhuh bha bad ka bamsap,” u la ong.
“Lada manla ka por ki ioh ia ki sakhi kiba biang, ki tnat treikam jong ka Sorkar Kmie kin trei la ka kam jong ki bad kin lap hi. Kim (Congress) lah ban buhrieh. Lada ka dei ka pisa kaba shu tuh phim lah ban buh ha bank, phin buhrieh katno? Ha kawei ka sngi, yn sa lap hi,” u la bynrap.
Haba pynksan ia ka jingkhynra jong ka tnat Income Tax ia ki shlem ka kompeni shna kiad jong u Dheeraj Sahu, u Spokesperson jong ka BJP Meghalaya State Unit u la ong, “ka jingkhynra jong ka Sorkar Kmie ka long ban pynpaw sha ka pyrthei haduh katno ki politishian jong kiwei kiwei ki party khamtam eh ka Congress ki la pynjot ia kane ka ri ka jong ngi.”
Da kaba iaroh ia u Myntri Rangbahduh ka ri u Narendra Modi, u la bynrap, “dang ha kine ki sngi ka don ka jingwad bniah ia ki nongialam jong ki ri bapher bapher bad u Modi u wan banyngkong ha ka jingtbit ban ialam ia ka ri jong ngi bad da ka jingtrei shitom ngin sa lah ban pynduh ia kane ka bamsap kaba la bam kruiñ ia kane ka ri jong ngi.”
Haba kylli, u Bah Kharkrang u la ong, “kano ka Jylla kaba synshar da ka BJP ka bym don ia ki kam pynroi , ai ia nga kawei ka nuksa ba kawei ka jylla ba la synshar ka BJP ba kam don ka roi ka par. Lada peit ia ka Assam, kaei ka jingphylla bad kiei kiba thymai kiba wan ha ka jylla Assam. Ngi khmihlynti ha kane ka jylla jong ngi ruh kan sa long kumjuh bad kan sa synshar ha ka BJP ha kawei ka sngi bad phin sa iohi katno ngi la duh ha kine ki snem ba la leit noh.”
U la bynrap ruh ba lada ka don ka jyrsieh bamsap ha kane ka Jylla Meghalaya, lada ioh ia ki sakhi ki sabut kiba biang, ka BJP kan mih beit shakhmat ban pynrem. “Lada lap ia ki sakhi sabut kin (tnat treikam ka Sorkar Pdeng) leh beit ia kaba donkam. Lada lap, ngin hap hi ban pynrem bad ngin ym ailad bad ngi kwah hi ba kane ka jylla jong ngi kan kiew shaphrang bad ka dei ban kynjoh lang sha kiwei kiwei ki jylla kiba la iaid shakhmat namarba ngi la sahdien palat,” ong u Bah Kharkrang.
Kum ban shu pyntip hangne, ka tnat Income Tax ka la ioh ban kurup kumba 300 klur ka pisa ha ka jingkhynra ha ki lai tylli ki jylla kiba don jingiadei bad ka karkhana shna kiad kaba na Odisha. Ka jingioh kurup ia kane ka pisa ka long hadien ba ki nongtrei jong ka tnat Income Tax ki la khynra ia ka jaka treikam jong ka Boudh Distillery Private Limited, kaba don ha Boudh District jong ka Jylla Odisha, ha Jharkhand bad ha West Bengal ha ka 8 tarik u Nohprah, 2023. Ka jingkhynra ban ioh kurup ia ka pisa ka dang iai bteng haduh mynta bad la ong ruh ba ka pisa ba la ioh kurup kan dang tam shuh shuh wat ia ka 300 klur namarba ka jingniew ia ka pisa ka dang iai bteng.
Kane ka kompeni ka dei ruh kaba don jingiadei bad u MP Rajya Sabha ka seng Congress na Jharkhand u Dheeraj Sahu. U Khun jong u Dheeraj, uba la tip kyrteng kum ku Ritesh Sahu u dei u Managing Director, katba u hymmen u Uday Shanker Prasad u dei u chairman jong ka kompeni kaba shna ia ka kiad. Ki nongtrei jong ka Incom Tax ki ong ba ka Boudh Distillery Private Limited ka dei ka paralok kaba iatreilang bad ka Baldeo Sahu & Group of Companies ia kaba la kynnoh ba ka la pyrshang ban kiar na kaba siew ia ka khajna bad kaba la ngat mynta ha ka jingshah khynra.
