Shillong, Nailur 15: U Bah Gloucester Nongbet uba long uwei na ki kaitor ba pawnam jong kane ka jylla Meghalaya un long uwei napdeng ki 84 ngut ki riewdonsap ha ka ri India ki ban ioh pdiang ia ka Sangeet Natak Akademi Amrit Awards ha ka jingrakhe ia ka Azadi Ka Amrit Mahotsav.
Ia kane ka khusnam yn sa sam da u Vice President jong ka ri India u Jagdeep Dhankhar.
Kine ki 84 ngut ki riewdonsap ki dei kiba la kynjoh ia ka rta kaba la 75 snem.
U Bah Gloucester Nongbet yn sa ioh pdiang ia ka Sangeet Natak Akademi Amrit Award halor ka jingnoh synniang jong u sha u sup u thiar jong ka rwai ka siaw tynrai ha kane ka jylla Meghalaya.
La kha ia u ha ka 8 tarik Naitung, 1938 ha Shillong, East Khasi Hills District.
U Bah Nongbet u la sdang ban rwai ia ki jingrwai sur tynrai naduh ka rta kaba dang khynnah. U la shongthiat kum u Ophisar IRS na ka Department of Customs, ka Sorkar Meghalaya.
U Bah Nongbet u dei uba ju ieid bha ia ki jingrwai sur tynrai, u nongthoh bad u nongshna jingrwai, u nongrwai bad uba la pyntbit bha ialade ban them Duitara kaba long kawei na ki jingtem tynrai kaba paw bha hapdeng ka jaidbynriew Khasi.
U la thoh bad shna ruh da ki spah tylli ki jingrwai shaphang ka mariang, ki jingrwai ieid ri bad ki jingrwai mane Blei.
U dei uba la ioh ia ka kyrdan ‘A’ grade jong ka All India Radio bad Doordarshan.
Ha ki snem ba mynshwa u ju rwai kylleng ka jylla bad sha ki bynta bapher bapher jong ka ri. U la thoh bun tylli ki Script na ka bynta ki jingialehkai Thiatar bad ki phlim Khasi bad u la iashim bynta ruh ban ak ha ka phlim Khasi kaba la ai kyrteng, Sha Ba Sep Ka Sngi bad katto katne kiwei pat.
