Shillong, Nohprah, 11: U Symbud Myntri Rangbah ka Jylla ha ka Lah Sngi u Blei u la iathuh ba ka Sorkar Jylla ka la tyrwa ban shna ia ka Surok Four Lane ha New Shillong Township. U la iathuh ruh ba ka Sorkar ka la tyrwa ban shna kham bun ki surok kiba pyniasnoh bad ki Surokbah National Highways la ka long ia ka surok Shillong Bypass lane ia ka surokbah Shillong-Jowai.
Ha ka jingiakren bad ka Batesi Tv u Symbud Myntri Rangbah u la iathuh ba u la lum ia ka jingialang bad ka Central Division PWD, Bypass Division PWD bad ka National Highway Division, ryngkat lang bad ka Deputy Commisssioner, ka tnat Finance bad Forest ban iathir iatai sani ha kaba iadei bad ka jingshna ia ki surok hapoh ka sor Shillong bad kumjuh ruh ha New Shillong Township khnang ban weng ia ka jingdheng kali kaba jur.
“Nga la khot ia kane ka jingialang bad kine ki lai tylli ki Division ryngkat ka tnat Finance, Forest bad ngi la iathir iatai ia kine ki mat bad ka Deputy Commissioner ha kaba ngi la wad ia ki lad ki lynti kumno ban shna pynbeit ia ki surok bad kumjuh ban shna kham bun ki surok khnang ban pynduna shisyndon ia ka jingdheng kali,” la iathuh u Symbud Myntri Rangbah.
Haba kylli, u la iathuh ba Sorkar Jylla kan sa pan jingiarap pisa na ka Sorkar Pdeng ban shna ia kine ki surok.
U Bah Tynsong, ula kyntait ruh ba ka Sorkar kan shna ia ka surok Four Lane ha Shillong. “Kaei kaba ngi kwah ka long la kumno kumno ngin shna ia ki Intermediate Lane bad nga tharai kata ka dei kaba biang palat,” u la bynrap.
Ka jingdheng kali ha nongbah Shillong katba nang mih ki sngi bad ki snem ka la nang jur na ka jingkharoi jong ki kali katba ki surok ki sah kumjuh.
Dang shen, ka Ingbishar Meghalaya High Court ha ka 24 tarik, Naiwieng ka la bthah ia ka Sorkar Jylla ban wad ia ki lad ki lynti ban pynduna ia ka jingdheng kali da kaba iasyllok bad kino kino ki Agency kiba lah ban ai jingmut halor kane.
