Shillong, Naiwieng, 11: U Bah Prestone Tynsong uba long u Symbud Myntri Rangbah jong ka Jylla u la takrain tyngeh ia ka Voice of the People Party (VPP) bad kynnoh ruh ba kane ka seng saiñpyrthei ka pynlong ishu politik ia ka jingshim rai jong ka sorkar ban ai jaka sa 1.4 akar na ka jaka jong ka Shillong Municipal Board ban pynkynriah ia ki briew kiba sah ha Them Iew Mawlong.
Ha ka jingiakren bad ki lad pathai khubor ha ka Lah Sngi u Blei, u Bah Prestone u la kynnoh ba ka VPP ka la shu kynthoh khlem da tip ia ki jingshisha bad khlem tih bniah ia ka jingdon jong ki briew kiba sah ha Them Iewmawlong.
“Kito ki nongialam kiba wohnia ia ka rai ba la shim da ka Sorkar, ki lehkai politik. Ka dei ka jinglehkai politik. (Kumno ki kynthoh) khlem da tip ia ki jingshisha bad khlem da tip ia ka nombar jong ki briew kiba sah ha katai ka jaka (Them Iewmawlong,” ong u Bah Prestone.
“Ngam kwah ban iapynphai nia, ngam kwah ban iapynlut kai ia ka por bad kine ki jait kam kaba ki kren,” u la bynrap.
“Haba ngi ong ba ki donkam sa khyndiat ka jaka kaba heh 1.4 akar kaba mut ba ia kane ka jaka yn ym aiti sha kine ki briew (kiba sah ha Them Iewmawlong) hynrei ban aiti sha ka Shillong Municipal Board. Ka jaka, kam dei ka jong, hynrei ka jaka ka dei ka jong ka Municipal,” la pynshai u Symbud Myntri Rangbah.
“Dei na kata ka daw ba nga ong, wat lehkai politic. Lada phi donkam ia ka jingpynshai, wan ban iakynduh ia nga bad ngan sa batai lut ia phi katba donkam,” ula ong.
“Phim lah ban shu ialam bakla ia ki paidbah. Mynno ngi la ong ba ngin ai jaka ia ki? Ia ka jaka yn ai sha ka Municipal bad ka Municipall kan sa leh kat kaba donkam ha kaba iadei bad ki nongtrei ki jong ka,” la pynshai shuh shuh u Bah Prestone.
“Nga la iohi ia ka jingkren jong ki, lada ngim lah, dei ban aiti ia kane ka ishu sha ka VPP. Hato kin leh aiu haba kim tip eiei hi ruh wat ia u A bad u B ne kim don jingtip eiei, hynrei ki shu pyrshang tang ban ialam ia ki paidba nongshong shnong jong ka jylla,” u la ong bad bynrap, “ki paidbah ruh ki sngewthuh bha ia kata bad nga kyntu ia kine ki nongialam (jong ka VPP) ba kim dei ban sngewthuh bakla bad kim dei ruh ban ialam bakla ia ki paidbah.”
