Shillong, Nohprah, 11: Ka North East Petroleum Mazdoor Union (NEPMU) ha ka ujor ba la phah sha u Commissioner & Secretary ka tnat Food Civil Supplies and Consumer Affairs ka Sorkar Meghalaya, u Pravin Bakshi, ka la rai ban ym wan kit shuh ia ka petrol sha ka Jylla Meghalaya naduh ka 12 tarik, u Nohprah, 2023.
Ha ka ujor ba la soi da u General Secretary u Ramen Das, ka NEPMU ka la pyntip ba ka jingshim ia kane ka rai ka long hadien ba ki dkhot jong ka Union kiba la shah kem ha ki Pulit ka Jylla Meghalaya naduh ka 24 tarik u Naiwieng, 2023 ki dang shah set haduh mynta mynne ha ka along ki Pulit ka Nongpoh, Ribhoi District halor ka jingshah kynnoh ba ki dei kiba donkti ban sei tuh ia ka umphniang petrol na ki kali kit Umphniang ha shiteng lynti.
Kane ka jingpynbna jong ka Union ka long hadien ba ki dkhot jong ka Union kim pat ioh jamin satia wat hadien ka jingiakynduh ia u Myntri ka tnat Food Civil Supplies and Consumer Affairs ka Sorkar Meghalaya, u Bah Coming One Ymbon ha ka 27 tarik, u Naiwieng, 2023.
“Hadien kane, ngi la kyrpad ia u Myntri ka tnat Food Civil Supplies and Consumer Affairs ha ka 27 tarik, Naiwieng, 2023 bad ha ka High Level Meeting kaba long hapoh ka jingpyniaid jong phi bad shim rai ba kan ym don kano kano ka jingleh tohmet sha ki dkhot ba luilui. Na ka bynta ban bah jamin ia kiba dang shah set ha along, ka Union kan iaid katkum ki lynti jong ka aiñ bad kan bud ruh ia ki kyndon treikam jong ka Oil Management,” la ong ka Union ha ka ujor sha u Commissioner and Secretary.
“Hynrei haduh mynta, wat uwei ruh u (dkhot) um pat lait satia na along wat hapdeng ka jingiakhun jong u Muktiar. Mynta ki dkhot jong ngi, ki dap da ka jingbitar halor kane, bad shim rai ba kin ym wan kit umphniang Petrol na ka bynta ka Jylla Meghalaya naduh ka 12 tarik, Nohprah, 2023 tad haduh ba (ki dkhot) kin da lait na along,” la ong ka Union.
