Shillong, Jylliew, 29: Da ki lak tylli ki dawai kuli, ki drip bad ki jait dawai bym lah ban tip ha ka sngi Palei la lap ba ka tnat ka Koit ka Khiah ka la kit da ki borni ban leit bret sha Marten.
Katkum ka jingiathuh jong u President ka Meghalaya Awakening Concern Citizen (MACC) u Bah Banshai Marbaniang kaba iaid ryngkat bad ka Awaken India Movement (AIM), katba ki dang iaid lynti ha ka por premmiet ha kane ka sngi, ki la lap saw tylli ki kali jong ka Shillong Municipal Board (SMB) kiba kit ia ki dawai bad ynda la buddien la lap ba la leit bret ia kine ki dawai ha Marten.
U Bah Marbaniang u la iathuh ba la lap ia kine ki dawai ba la song ha ki byrni la sei na ka Medical Store kaba don hajan ka Ganesh Das Maternal & Child Health Hospital, Shillong bad la pynkit ha ki ar tylli ki kali jong ka Municipal.
“Ngim lah ban tip na kaei ka daw ba la bret ia kine ki dawai. Kane ka dei kaba ngim lah satia ban pdiang daleilei ruh em bad ngi hap ban pan jingpynshai na ka ophis District Health & Medical Officer (DM&HO) bad na ka tnat ka Koit ka Khiah,” ong u Bah Marbaniang.
“Ban shu bret kai katne lak tylli ki dawai kan buh ia ki paidbah ha ka umdum. Ngin hap ban buddien ia kane bad ngin hap ban pan jingpynshai wat na ka Myntri ka Koit ka Khiah ka Sorkar Jylla, ka Dr. Ampareen Lyngdoh,” la ong u Bah Marbaniang.
U la kren bynñiaw ruh ban iohi ba la shu bret ei ia kine ki dawai sha Marten katba sha ki jaka ai jingsumar ha ki District ki paidbah kim ioh satia wat tang ia ka dawai ba la mynjur da ki doktor.
Haba kylli, ula ong, “ngim lah ban tip hynrei ka Sorkar ka dei ban ai jingpynshai, ka tnat ka Koit ka Khiah ka dei ban ai jingpynshai. Ki dawai kiba dei ban poi sha ki PHC, CHC hynrei mynta la bret sha Marten. La shu thied kai ia ki dawai katba ki paidbah tang ia ka dawai ruh kim ioh. Ngi sngew ba ka Myntri ka Koit ka Khiah ka dei ban ai jingpynshai halor kane.”
U la ong ruh ba lada kine ki dawai ki dei kiba la kut noh ka por ban pyndonkam (expired) bad lada la aiti sha ki PHC bad CHC dei ma ki hi kiba hap ban thang noh lada ym lah ban pyndonkam shuh namar ba la kut ka por ban pyndonkam.
Da kaba kynnoh ba kane ka jingbret kai da ki lak tylli ki dawai ka dei ka jingpynsyrwa kai ia ka pisa u paidbah bad ka don ruh ka bamsap, u Bah Marbaniang u la ong, “ia ki dawai la thied da ka pisa u paidbah. Lada ia ka pisa jong ka Sorkar la shu pyndonkam ban thied dawai bad ban bret noh shipor ka long shisyndon ka bamsap. Ngim lah ban pdiang bad ngin buddien tad haduh ba ngin da ioh ia ka jingshai kaba pura ban tip ia kaei ka daw kaba la pynlong ia ka tnat ka Koit ka Khiah ban bret ia ki dawai sha Marten.”
“Lada donkam ngin sa wad da ka RTI, nga ngeit skhem ba ka sorkar kan ym lah ban buhrieh bad lada ka Sorkar ka buhrieh ka mut ba ka Sorkar ka buhrieh ia ka pisa u paidbah shano re shano ba ngim lah ban tip,” u la bynrap.
