Shillong, Jylliew, 29: Ban pynthikna ia ka jingshngaiñ jong ki paidbah nongshong shnong kiba bam ia ki dohkha ba la wanrah nabar ka jylla Meghalaya ka Assistant Commissioner jong ka ophis Food Safety ka Kong DBS Mukhim ha ka sngi Palei ka la hiar jurip ia ka Basa die dohkha ha Iewduh bad ban leh ruh ia ka test khnang ban lap la ka dang don neem ia ka jinginjek dawai Formalin ha ki dohkha.
Ka Kong DBS Mukhim ha ka jingiakren bad ki lad pathai khubor hadien ba ladep leh test ia ki dohkha ryngkat ka jingsakhi lang jong ki nongialam ka Khasi Jaiñtia Fish Wholesaler and Retailer Association (KJFWRA) ka la iathuh ba hadien ba la leh test ia ki dohkha ka la pynthikna ba ki dohkha ba la die ha Iewduh ki dei kiba shngaiñ ban bam bad watla katta ka la iathuh ba na ka liang ka ophis jong ka Food Safety ka la rai ban shim nuksa katto katne tylli ki dohkha ba ladep leh test ha Iewduh ban leh test biang ha Laboratory jong ka Food Safety.
Shuh shuh ka la iathuh, ka ophis jong ka Food Safety ka la rai ban buh da ki nongtrei jong ka tnat Fisheries ba kin leh test manla ka sngi ha Khlieh Iewduh ia ki dohkha kiba la wanrah nabar ka jylla bad lada lap ba don ka jinginjek dawai formalin ia ki dohkha yn ym shah satia ban die ha iew.
