Ka Sorkar Jylla ka la thaw da ki Rule ban pynkhlain ia ki bniat jong ka The Narcotic Drugs and Psychotropic Substances Act, 1985, namarba ka Section 64 (a) jong kane ka aiñ ka ai laitluid ia kino kino kiba pyndonkam ia u drok kin lait suk na ki shrip jong ka aiñ.
U Myntri ka tnat Social Welfare ka Sorkar Jylla u Bah Paul Lyngdoh ha ka 12 tarik u Jylliew, 2023 u la lum da ka jingialang ba la iashim bynta da ki heh ophisar jong ka tnat Pulit, na ka tnat ka Koit ka Khiah, na ka tnat Social Welfare, na ka MIMHANS, na ka tnat CID bad na ki tnat treikam bapher bapher jong ka Sorkar Jylla.
Ha ka jingiakren bad ki lad pathai khubor u Bah Paul Lyngdoh u la iathuh ba ka jingthaw ia ka Rule ka long hadien ba la iohi ba ka jingwan rung jong u drok sha kane ka jylla Meghalaya ka la long shaba palat liam bad katkum ka jingioh jingkhein naduh u snem 2019 ka jingdon jong ki nongpyndonkam ia u drok ka la kiew bha ha kane ka jylla bad ruh ha ki 5 tylli ki district jong ka jylla la ithuh kum ki jaka ba ka jur bha ka jingpyndonkam ia u drok.
Shuh shuh u la iathuh ba lyngba ka DREAM project ia kaba la pynbna paidbah ha u snem baladep, la mynjur ia ka draft policy ban pyllaitluid ia ka Jylla Meghalaya na u drok.
Lyngba kane ka mishon, u Mission Director bad ka kynhun jong u, kin iarap ia ka Sorkar ban iatreilang bad ki tnat treikam bapher bapher bad nalor kata la mang ruh 5 klur tyngka na ka bynta ban pynlong ia ki jingpynshai bad ki jingpynsngewthuh sha ki paidbah kumno ban iakhun thma pyrshah ia ka jingjyllei jong u drok.
“Kane ka dei ka aiñ kaba kongsan ia kaba ym shym la pynrung haduh mynta ia kaba la tip kum ka Prevention of Illicit Traffic in Narcotic Drugs and Psychotropic Substances Act, 1988 (PITNDPS). Haduh mynta, ngim pat lah ban pynrung ia ki kyndon jong kane ka aiñ namarba ngim pat lah ban thaw ia ka Advisory Board ,” ong u Bah Paul.
“Hynrei mynta ka sngi, u Nongbishar ba la shongthait jong ka Ingbishar Meghalaya High Court u S. Pande uba long ruh u Chairman jong ka State Consumers Council u la ai ia ka jingmynjur ban shimti kum u Cchairman jong ka Advisory Board,” iathuh u Bah Paul.
“Tang shu mynjur u Chairman jong ka Advisory Board ban shimti kum u Chairman ka jingkhang ka la plie ia ngi ban pyntreikam pura ia kane ka aiñ ba kongsan,” ong u Bah Paul.
U la pyntip ruh ba katkum kane ka aiñ, kino kino ki briew kiba ju don dak sniew kum ki nongkhaii drok lane ki briew kiba ju don bynta ha ka jingkhaii drok, la ki dei kiba rit ne kiba heh, kin shah pynngat hapoh kane ka aiñ bad kin hap ngat ha ka jingshah set along kaba 3 bnai bad kaba lah ban pynjlan haduh shi snem kynthih.
“Lada ki sngew ba ka jingshah set along ka long kaba be-aiñ, ki lah ban kyrpad ia ka Board da kaba ai da ka jingthoh ba balei kim dei ban shah set bad balei kim dei ban shah pyllait,” la ong u Bah Paul.
Ha kane ka jingialang, la iakren ruh ban pynkhlaiñ ia ka Narcotic Cell kaba don mynta tang lai ngut ki Pulit Ophisar. Ka jingialang ka la rai ban kyntiew ia ka jingdon jong ki Pulit khnang ba yn dup lah ban ai jingshakri bad ban tehlakam ia ka jingjyllei jong u drok.
Lyngba ka DREAM project, baroh ki Deaddiction Centre yn pyndonkam kum kawei ka rynsan ban ioh ia ka jingkheiñ ba thikna bad ban ithuh ia ki briew kiba dei hok ban ioh jingsumar ha kaba ia ki kyrteng ban buhrieh noh bad ki jingkheiñ bapura kin don lut bad ka Sorkar.
