Shillong, Nailur, 05 : Ka seng kieng atiar ba la shah khein be-ain, ka Hynñiewtrep National Liberation Council (HNLC) ha ka lah sngi u Blei ka la pynkynmaw biang ia ka jingdawa na ka Sorkar ban weng lut ia baroh ki Case ba la pynngat ia baroh ki nongialam ka seng kumba la leh da ka Sorkar Nagaland ia ka NSCN (IM) ha u snem 2002.
“Ka Sorkar kam dei ban shet kylla lane ban ialam bakla ia ka HNLC. Ngi khmihlynti ia ka Sorkar ba kan weng shwa nyngkong eh ia ki mukotduma, kumba la leh da ka Sorkar Nagaland ha u snem 2002. Lada ka Sorkar Nagaland ka lah ban leh ia kane, balei ka Sorkar Meghalaya ka tieng ban bud ia kane kajuh ka lynti?” la buh jingkylli u General Secretary-cum-Publicity Secretary ka HNLC u Bah Sainkupar Nongtraw ha u kyrwoh ba la phah sha ki lad pathai khubor.
Haba shim ia ka jingkren jong u Bah Prestone Tynsong uba long ruh u Symbud Myntri Rangbah ka Jylla uba bat ia ka tnat Kam Pohing, kum ka ‘political nonsense’ ne ka jingkren bym don jingmut, u Bah Nongtraw u la ong, “ha ka jingkren jong u Bah Tynsong ha kaba iadei bad ka jingphah ka Kashari ia ka shithi khot hajir ia nga kum u General Secretary, ka paw shai ba ki ktien ba u kren ki dei tang ki jingkren bym don nongrim. Ka jingkylli kaba mih ka long: mano ba don ia ka bor ban thung ia ki nongbishar jong ka Supreme Court bad ka High Court? Ka bor ban map ia ki seng kieng atiar ka shong ha ka Sorkar Jylla.
U la ong ba ha kiba bun ki ri, dei u khlieh synshar jong ka jylla ne u khlieh synshar jong ka sorkar, kum u President ne Myntri Rangbahduh, kiba don ia ka bor ban map.
Ha kawei pat ka liang, ka kamram jong ka Ingbishar ka long ban shong bishar bad pyndonkam ia ka aiñ ym ban ai jingmap.
U Bah Nongtraw u la ai da ka nuksa kaba iadei bad ka NSCN (IM), tang hadien ba ki nongialam Naga ki la rung sha India ban iashim bynta ha ka jingiakren iasuk ha u snem 2002, ka sorkar Nagaland ka la weng lut ia baroh ki mukotduma pyrshah ia ki. Haba peit ia kiei kiba la jia, mano ba don ia ka bor ban map ei noh ia ka Mizo National Front?
“Lada u Bah Tynsong u buh jingkylli ia ki kam runar ba pyntriem, ka jingong jong u ka iatakhuh bad ka jingkren jong u Myntri Rangbah, ki ophisar ka MHA bad u AK Mishra uba long u ksiang nongpyniasuk. Ka jingong jong u Bah Prestone ba ka kam bymman ka dei beit ka kam bymman, ka iatakhuh bad ka jingngeit ba ka lah ban don ka jingiapher ha ka jinglong jong ki kam bymman bapher bapher,” u la ong.
Haba kynnoh ba ka dei tang ka buit ban pynap shrip ia ki nongialam ka HNLC, u Bah Nongtraw u la ong, “lada u Bah Tynsong u pynksan ba ka dei tang ka kam ba ju leh da ka Kashari, hato kane ka mut ba lada u Chairman bad u General Secretary ki ioh ia ka hukum shah kem (arrest warrant), ka Sorkar kan ym lah ban tuklar namar ka jingiaphiah ia ka bor hapdeng ka bor synshar ka Jylla bad ka Kashari? Lada ka Sorkar hi kam lah ban leh eiei, ka paw ba ka dei ka jingpynap shrip ba la pynap lypa.”
