PHAH PYNKHLAIÑ ÏA KA ANTI-INFILTRATION CHECK GATE HA EJH
Shillong, ïaïong 29: Ka Jaiñtia National Council (JNC) ha ka Lah Sngi u Blei ki la dawa ia ka Sorkar Jylla ban weng noh ia ka Check-post jong ki shipai Border Security Force (BSF) na Sonapyrdi bad ban pynkynriah ia ki sha khappud jong ka East Jaiñtia Hills District bad ka ri Bangladesh.
Ha ka dorkhas ba la aiti ha u Symbud Myntri Rangbah ka Jylla uba peit ia ka tnat Kam Pohing Bah Prestone Tynsong, ki nongialam jong ka Council ki la dawa ia ka Sorkar ban pynkhlaiñ ia ka Anti-Infiltration Check Gate ha East Jaiñtia Hills District.
Kane ka jingdawa jong ka seng ban pynkynriah ia ki shipai BSF na Sonapur ka long hadien ba ki la mih ki jingjia bapher bapher bad ki jingshah pyndik ba laiphewjait jong ki paidbah nongshong shnong ha ki shipai BSF.
“
Ngi dawa ia ka Sorkar ban pynkynriah lut sha khappud ia ki Check Post jong ki shipai BSF kiba don ha ha Sonapyrdi, Umbluh, Dona kaba ki shipai ki ju pynlong ia ki jingtalasi kali manla ka sngi,” ong u President ka JNC Sambormi Lyngdoh ha ka jingiakren bad ki lad pathai khubor hadien ka jingiakynduh ia u Bah Prestone.
“Ki shipai BSF kim shym la lah ban pyndep ia la kamram ba la bynshet ha ki. Kim shym la lah ban ai jingiada ia ki paidbah kiba im ba sah ha ki shnong khappud na ka jingprongtuh jong ki nong Bangladesh kumba la sakhi ia ka jingshah pyniap ba dang shen hajan ka shnong Umkiang ha kaba u Bah Sylvanus Dhar u la duhei ia la ka jong ka jingim bad dang shen ki nong Bangladesh ki la kawang da ki maw ia ki nong India bad pynsaphriang ia ka jingjia ha ka Social Media. Ki shipai BSF kim shym la lah ban tehlakam ia ka jingrung beain jong ki mynder na ka ri Bangladesh shapoh ka District ban leh ia ki kam runar,” la ong u Bah Sambormi.
Ka la pyntip ruh halor ka jingioh ujor na ki nongshong shnong ha kaba ki ju iathuh ba ki shipai BSF ki rung sha ki shnong ki thaw ban talasi naphang ia ki kali bad tang ki trai shnong kiba shah pynlong sohpdung ha ki shipai BSF.
“Dang shen ha ka shnong Sonapyrdi ha ka 20 tarik, Iaiong, 2024 ki shipai BSF ki la shoh pynmynsaw ia ki lai ngut ki samla na ka shnong Thangskai bad Lum Tongseng bad pynjulor ruh ia ki kali jong ki,” u la ong.
Ka Seng ka la kyrpad ia ka Sorkar ban pynkynriah mardor ia ki shipai BSF sha khappud khnang ban tehlakam ia kino kino ki jingjia kiba lah ban mih hadien habud.
Shuh shuh u Bah Sambormi u la iathuh ba ka jingdawa ia ka Sorkar ban pynkhlain ia ka Anti-infiltration Check Gate ha East Jaiñtia Hills ka long namar ka jinglaitlan ha khyrdop talasi mynder (Entry-Exit Point) kaba don ha Ratacherra.
“Ngi la iakren bad u Symbud Myntri Rangbah ban pynkhlaiñ ia ka jingtalas ha ki Entry-Exit Point ha East Jaintia Hills khnang ban khanglad ia ka jingrungtuh jong ki mynder ri ha ka por mynmiet. Namar ka jingbym don jong ki Pulit kiba iaid pahara ha ka por mynmiet ia ki nongrung beain ym shym la lah satia ban iohkem,” ula ong.
U la ong ba ka jingrung kyrthep jong ki mynder ri shapoh ka East Jaiñtia Hills District kan wanrah ia ka jingkylla ha ka jingbun briew bad kan ktah ruh wat ia ka iohkam iohjam jong ki trai shnong namar ka jingpyntreikam dang shen ia ka Citizenship Amendment Act (CAA) hapoh ka ri bad kane kan buh jingman shuh shuh ia ki nongshong shnong trai jylla lada ki mynder ri na ka ri Bangladesh kin dang iai bteng ka jingrung beain shapoh ka District.
