Shillong, ïaïong 29: Kawei ka trok kit jri kaba don ïa u Number JK05-H-0666 ka la kem ding kynsan ha ka Lah Sngi u Blei katba ka dang ïeng harud surokbah National Highway Fourlane ha ka shnong Jyntru, Ri Bhoi District.
Kane ka la jia ha ka por kumba 2:00 baje noh phai sngi bad katkum ka jingïathuh jong u nongñiah jong kane ka trok la ong ba ia ka daw jong ka jingkem ding ka kali ym pat lah satia ban tip bad la shu suba ba ka lah ban dei na ka jingthud jong ki Wire ne ka Short Circuit.
Ha kane ka jingjia u nongbud jong ka trok u la shu mynsaw malu mala katba u nongñiah u la lait thaw na ka jingmynsaw hadien ba u la mih kloi kloi napoh ka trok.
Tang hapdeng katto katne por, ki Pulit jong ka tnat Fire and Emergency Service (F&ES) Ribhoi District ki la wan poi ha kane ka jaka ban pynlip ia ka ding kaba la klang ishyrkhei bha ha surok.
Ka jingklang ba shyrkhei jong ki thylliej ding ka la pynher syrngiew lut ia ki nongleit nongwan kiba la sakhi ia kane ka jingjia.
