Shillong, Nailur, 29: Ka Jaiñtia Students’ Unoin (JSU) Seng Kmie ka la phah ïa ka shithi ujor sha ka Myntri ka tnat ka Koit ka Khiah ka Sorkar Jylla ka Dr. Ampareen Lyngdoh ban pan jingpynshai halor ka resol ba dang shu mih ha ka sngi Thohdieng namarba kane ka jingpynmih ïa ka resol hapoh ka website www.meghealth.gov.inkam long satia kaba i lah ban shañiah.
Ka seng ka lap ba la shu pynmih tang da ki Roll Number jong ki nongthoh eksamin bad la lap ruh don ki Roll Number kiba mih ar sien ha ka result sheet bad na liang ka seng ka la ong ba ka ophis Directorate of Health Service (DHS) ka dei ban pynshai ïa kane ka rukom pynmih resol bad kane ka rukom leh ka la pynsah umdum bad pynartatien ïa baroh kiba ïakhun ïa ka eksamin Staff Nurse.
Ka JSU ka la ong, ha ka jingshisha kat ïa ka Written Examination ladei ban pynmih resol da ki jingïoh marks jong ki nongthoh eksamin khnang ba kin tip katno ki ïoh bad ym dei ban shu pynmih tangdep rukom tang da ki Roll Number namarba kane ka pynartatien ïa ka seng ba ïoh ba ka don eiei shalyndet ha ka rukom thungkam thungjam ha ka tnat ka Koit ka Khiah ka jylla.
Ka Seng ka la dawa na ka tnat ka Koit ka Khiah ka Sorkar Jylla ban pynmih da ki Marks khnang ban ïashai lang baroh.
Halor kane ka seng ka la ïoh ruh ban ïakren bad ka Dr. Ampareen Lyngdoh ha kaba ka la pyntip ba kan shimkhia halor kane bad ïathuh ruh ba ka ladep ban bthah ïa ki ophisar jong ka ophis DHS ban pynmih lang ïa ki Marks bad ki Answer Key jong ka resol Staff Nurse bad ANM.
