Shillong, Rymphang, 23: Ka kynhun jong ki trai ba bun ïa ki kali kit mar na rilum Jaintia kiba don hapoh ka shatri jong ka Meghalaya Joint Action Committee kiba kynthup ïa ka Association of Meghalaya Traders and Transporter (AMTT), ka Jaiñtia Hills Truck Onwers Association (JHTOA) bad ka All Jaiñtia Hills Cement and Clinker Association (AJHCCA) ha ka sngi Thohdieng ki la dawa ïa ka Sorkar Meghalaya Democratic Alliance (MDA) ba la ïalam da ka National People’s Party (NPP) ba kan pynurlong noh ïa ka jingkular ban pynkhreh ïa ka Mining Policy kaba la sahteng mynta la shisnem kynthih.
U Finance Secretary ka MJAC u Bah Balen Thubru ha ka jingïakren bad ki lad pathai khubor u la kynthoh halor ka jingbym lah jong ka Sorkar Jylla ban pynurlong ïa ka jingkular ban pynkhreh ïa ka Mining Policy kumba la kular da u Myntri Rangbah.
“Ha East Jaiñtia Hills bad ha West Khasi Hills ki nongkhaïi dewiong ki la pynkup burom ïa u Myntri Rangbah hadien u la kular ba ka Sorkar Jylla kan pyndep noh hapoh shisnem ban pynkhreh ïa ka Mining Policy hadien ba ka National Green Tribunal (NGT) ka la khang ïa ka jingtih dewiong thliewkhnai ha kane ka jylla Meghalaya,” u la ong.
“Ka jingbym pat lah ban pynkhreh ïa ka Mining Policy ka la pyndiaw mynsiem ym tang ïa ngi ki nongkhaïi hynrei ka ktah ruh wat ïa ki nongbylla tih dewiong hynrei wat ïa ka jingïoh lum khajna jong ka Sorkar,” la ong shuh shuh u Bah Thubru.
Ka MJAC ka la dawa ruh ïa ka Sorkar Jylla ba kan ïakren bad ki bor badei peit jong ka Sorkar Pdeng na ka bynta ban shna ïa ka Land Custom Station (LCS) ha ka shnong Kuliang, East Jaiñtia Hills District khnang ba kan pynsuk ïa ki nongshalan mar ban pynpoi ïa ki mar ki mata sha ka ri Bangladesh.
U Secetary General jong ka MJAC u Bah Enrico D. Passi u la ïathuh ba ka jingdon jong ka Land Custom Station (LCS) ha ka shnong Dawki ban shalan ïa ki mar ka buh jingeh ïa ki trok kit mar ha kaba ki hap ban ap haduh saw ne san sngi kynthih tang ban ïoh ïa ka Clearance na ka daw ka jingbun shaba palat ki trok kiba leit sha ka ri Bangladesh.
Halor ka jingpyrshah ki kynhun bapher bapher na East Jaiñtia Hills ïa ka jingtyrwa ka Sorkar Jylla ban wanrah ïa ka lynti rel sha East Jaiñtia Hills u Chairman ka MJAC, Bah Biangshwa Shylla u la ong ba kum ka kynhun jong ki trai kali kiba im kamai jakpoh ki pyrshah ïa ka jingthmu ka Sorkar ban wanrah ïa ka lynti Rel namarba kin mad ïa ka jingduh nong kaba khraw namarba ka Rel kan kit da ki hajar ton katba ki kali ki kit tang da ki phew ton.
U Bah Shylla u la ong, lada ki kali ki kit ïa ki mar ki mata ki trai kali ki dang ïoh ïa ka kamai kajih hynrei lada wan ka lynti Rel baroh ki kali kin hap ban shu kut ha sem.
U la ong ruh ba ka kynhun kan ieng pyrshah ban ïakhun haduh ban da jop bad kyrpad ruh ïa baroh ki kynhun bapher bapher ban ai jingkyrshan ïa kane ka jingthmu ban pyrshah ïa ka lynti Rel.
