Jowai, Nailur 28: Ka jingiapyni bor kaba la neh ar sngi kynthih hapdeng ki Pnar kiba sah ha ka shnong Lapangap, West Jaiñtia Hills District bad ki Karbi kiba sah ha West Karbi Anglong District ka la thanda hadien ba ki bor synshar jong ka West Jaintia Hills bad ka West Karbi Anglong ha ka sngi Palei ki la iakynduh markhmat ha ka shnong Lapangap ban pynkut noh ia ka jingiakynad hapdeng kine ki ar jaidbynriew kiba sah ha khappud jong ka Jylla Meghalaya bad ka Jylla Assam.
Na ka liang jong ka West Karbi Anglong District la mihkhmat da ka Deputy Commissioner ka Krishna Baruah bad u Superintendent of Police u I. Barua katba na ka liang jong ka West Jaintia Hills la mihkhmat da u Deputy Commissioner u Bah B.S. Sohliya bad u Superintendent of Police u Bah Chemphang Syrti.
Ha kane ka jingialang, ki Karbi ki la dawa ba dei ban phut noh ia ki tynrai dieng ba la thung ha ki lum Pynthor bad lada ki Pnar ki ailad ban phut ia ki dieng ka jingsuk kan wan biang bad ki Pnar kin ioh ban ot ia u kba ba ladep thung kynthup ruh ia u kba uba ki la rep ha Nongjrong.
Ki bor pulit jong ka jylla Assam ki la kular ban ai jingiada ia ki Pnar haba ki leit ot ia u kba uba ki la rep ha Nongjrong bad na ka Liang jong u Deputy Commissioner jong ka West Jaintia Hills u la mynjur ia kane ka jingbuh kyndon jong ki Karbi bad la shim ia ka rai ban leit phut ia ki tynrai dieng lashai ka sngi Thohdieng.
Ha kaba iadei bad kane u Waheh Shnong jong ka shnong Lapangap u Bah Deimonmi Lyngdoh u la pyntip ba un lum da ka dorbar paidbah ha ka por janmiet ban pynsngew hakhmat ki paidbah ia kane ka jingdawa jong ki Karbi, hadien ba u Deputy Commissioner jong ka West Jaintia Hills District u la pynpaw ba kan bha ban phut noh shwa ia ki tynrai dieng ban ia kaba duh noh ia u kba u khaw.
Namar kane ka jingiakynad, ki nongrep jong ka shnong Lapangap ki la sangeh ban leit rep sha ki lyngkha ki risai bad na ka liang ki Karbi ruh ki la sangeh ban pyni bor biang ia ki Pnar ha Lapangap.
