Shillong, Lber 18: Ki lai tylli ki sengbhalang ha ka Lah Sngi u Blei ki la dawa ia ka Sorkar MDA ba la ialam da ka NPP ban kyntu ia ka Sorkar Pdeng ba kan pyllait pura ia ka jylla Meghalaya na ki kyndon jong ka Citizenship (Amendment) Act, 2019 bad Citizen (Amendment) Rules, 2024 bad ban pyntreikam noh mardor ia ka Inner Line Permit (ILP) ban tehlakam ia ka jingwanrung jong ki poiwir sha kane ka jylla.
Kine ki lai seng kiba kynthup ia ka Hynñiewtrep Youth Council (HYC), ka Jaiñtia National Council (JNC) bad ka Confederation of Ri Bhoi People (CoRP) ki la phah da ka dorkhas sha u Myntri Rangbah ka Jylla Conrad K. Sangma ba un shimkhia ban tuklar halor kane ka jingdawa.
Ha ka jingiakren bad ki lad pathai khubor u President ka HYC Bah Roy Kupar Synrem u la ong, “ngi la kyntu ia u Myntri Rangbah ba un pynsngew sha ki tyndong skhor jong ka Sorkar Pdeng ba kan pyllait pura ia ka CAA, 2019 bad ia ka Rule ba la pynmih dang shen bad ban pyntreikam mardor da ka ILP ha ka jylla Meghalaya baroh kawei.”
U la ong ba ka Ministry of Home Affairs, ka Sorkar India ha ka 11 tarik Lber, 2024 ka la pynmih ia ka Citizenship (Amendment) Rules, 2024 na ka bynta ban pyntreikam ia ki ain jong ka Citizenship (Amendment) Act, 2019.
“Watla ia ka CAA, 2019 la pyllait ban pyntreikam ha ki jaka riewlum ka jylla, hynrei ha ka jingshisha ka Jylla Meghalaya baroh kawei kam hap hapoh ka Khyrnit Bahynriew jong ka Riti Synshar ka ri India. Ki dang don ki jaka hapoh ka nongbah Shillong, ka nongbah jong ka jylla ha kaba ki kyndon ain jong ka Khyrnit Bahynriew kim treikam satia bad kumjuh da ki hajar ngut ki poiwir kiba shong basah,” la ong u Bah Synrem.
“Ha kum kine ki khep, lada ki briew kiba sah ha kine ki jaka ki shim kabu ia ka jingbym treikam jong ka Aiñ ki lah ban rung sha kine ki jaka bad hadien kata kin sa aplai ban long nongshong shnong hapoh kane ka CAA, 2019, ha kata ka por kumno ka Sorkar Jylla kan khanglad ia ki ban ioh long ki nongshong shnong hapoh kane ka aiñ? Hato ki don neem da kiwei pat ki lad ki lynti ban buddien ia ka jingdon jong kine ki briew kiba sah mynta hapoh kine ki jaka khnang ba yn dup lah buh jingkhein na ka bynta ki jingdonkam hadien habud,” u la ong.
Shuh shuh u Bah Synrem u la ong, “ngi sngewkhia bha watla kiba bun ki jaka ha ka jylla la pyllait na ka jingshah kynthup ha ka CAA, 2019, ka Jylla kan shah ktah na ka jingwan tuid na kiwei ki jylla bad khamtam eh na ka jylla Assam. Ka jingbymdon kano kano ka ain kaba tehlakam ia ka jingrung jong ki briew kiba nabar shapoh ka jylla, ngi sheptieng ba ka jingpyllait na ka aiñ kan pulom bad ngi lah ban mad ia ki jingeh hadien habud na ka jingwanrung kyrthep jong ki briew kiba nabar shapoh ka jylla.”
“Namarkata, ka lad jingiada kaba hakhmat eh ban tehlakam ia kane ka dei tang ka jingpyntreikam noh mardor ia ka ILP bad kumjuh ruh ban pyllait pura ia ki kyndon jong ka Citizenship Amendment Act ha ka jylla,” ong shuh shuh u Bah Synrem.
