Shillong, Lber, 18: Ka North East Students’ Organisation (NESO) ha ka lah sngi U Blei ka la ujor hakhmat ka Ïingbishar Supreme Court ka ri India pyrshah ia ka Rule jong ka Citizenship (Amendment) Act 2019 bad kyrpad ruh ia ka Ïingbishar Supreme Court ban pynmih da ka hukum kaba pynsangeh ia ka jingpyntreikam ia ka Rule jong kane ka aiñ.
Kum ban shu pynkynmaw hangne, ka NESO ka la ujor hakhmat ka Ingbishar Supreme Court ha ka 19 tarik, Nohprah, 2019 pyrshah ia ka Citizenship Amendment Act 2019.
Watla ia kane ka ain la pyllait ban pynjari ha ki jylla ba la shah kdup ha ka Inner Line Permit (ILP) ba kynthup ia ka jylla Mizoram, Nagaland bad Manipur bad kumjuh ruh ha ki jylla ba hap hapoh ka Khyrnit Bahynriew ka Riti Synshar ka Ri India ba kynthup 98% ha ka jylla Meghalaya, 70% ha ka jylla Tripura bad ha ki 8 tylli ki District jong ka jylla Assam hynrei ha ki 27 tylli ki District jong ka jylla Assam ym shym la pyllait satia.
Ka NESO ha u kyrwoh ba la phah da u Chairman u Bah Samuel B. Jyrwa ka la ong ba kane ka la buh jingma ia ka thain Shatei Lammihngi baroh kawei ha ki sngi ki ban sa wan.
Ka NESO ka ong shuh shuh, na ka bynta ban iada ia ki jaidbynriew ritpaid ka thain shatei lammihngi kiba la shah ktah na ka jingwan rung kyrthep jong ki mynder ri na ka ri Bangladesh, la donkam ba ia ka Citizenship Amendment Act 2019 ym dei satia ban pyntreikam namarba kan nang pynsniewdur shuh shuh ia ka jinglong jingman jong ka thain Shatei Lammihngi.
Ki nongialam jong ka North East Students Organisation (NES0) ha ka lah sngi U Blei ki la poi sha nongbah New Delhi hadien ba ka Ingbishar Supreme Court ka la buh sngi ban shong bishar ha ka 19 tarik, Lber 2024 ia ka mukotduma jong kane ka kynhun hadien ba ka la ujor ia ka jingpynlong aiñ jong ka Sorkar India ia ka Citizenship Amendment Act, 2019 bad pynmih ruh dang shen ia ka the Citizen (Amendment) Act Rules, 2024.
Ia kane ka kynhun la lamkhmat da u Chairman u Bah Samuel Jyrwa ryngkat ka jingsynran lang jong u Adviser ka NESO u Samujjal Bhattacharjya, u President ka Khasi Students Union (KSU Bah Lambokstarwell Marngar bad kiwei kiwei.
Dang shen ki kynhun kiba don hapoh ka shatri jong ka NESO ki la thang ia ka Citizen (Amendment) Rules, 2024 ha baroh kawei ka thaiñ Shatei Lammihngi hadien ba ka Sorkar India ka la pynmih paidbah ha ka 11 tarik mynta u bnai.
