Shillong, K’lyngkot, 29: Ki nongialam jong ka Union of Cook-cum-Helper ha ka taiew baladep ki la leit pynsngew sha ki tyndong skhor jong ka Sorkar Pdeng ia ka jingdawa ban kyntiew ia ka Honorarium jong ki nongshet ja sngi ha ki skul sha ka T.5 hajar.
Ha ka jingiakren bad ki lad pathai khubor ha Shilong Press Club ha ka lah sngi U Blei, ka President jong ka Union ka Kong Banalis Syiem ka la iathuh ba u Secretary jong ka Ministry of Education, ka Sorkar Pdeng u Sanjay Kumar u la kular ban buh hakhmat eh ia kane ka jingdawa jong ka Union.
Ha ka jingleit sha Delhi, la synran lang ia ki nongialam jong ka Union da ka Kong Delina Khongdup kaba dei ka dkhot jong ka National Commission for Women.
Ka la iathuh ba u Kumar u la ong ba ia kane ka mat jong ki nongshetja sngi u la kular ban buh hakhmat bad ban shim ruh kum ka mat kaba kyrpang tam namarba u sngewthuh ia ka jingpan kam dei kaba khia haduh katta katta.
“Katkum ka sur kaba u kren, ngi khmihlynti ba kin sa pyntreikam noh mynta u snem hi hadien ka Financial Year,” la iathuh ka Kong Syiem.
“Kum ki nongshet ja sngi ha ki skul, ngi kyrpad ruh ia u Myntri Rangbahduh ka ri u Narendra Modi ba un sngewsynei ia ki nongshet ja sngi ban kyntiew ia ka jingsiew Honorarium na ka mang tyngka jong ka Sorkar India,” la ong ka Kong Syiem.
“Ngi kyrpad ruh ia u Myntri Rangbah ka Jylla Assam u Himanta Biswa Sarma uba dei u nongialam ha kane ka thaiñ Shatei Lammihngi ban iakren lem ia kine ki jingdawa jong ngi bad ka Sorkar India ha Delhi,” la kyrpad kane ka nongialam jong ka Union of Cook-cum-Helper.
Katkum ka jingiathuh jong ka Kong Syiem, ki nongshet ja sngi ha baroh ki skul hapoh ka jylla ki don kumba 20 hajar ngut bad ki ioh ia ka bainong na ka Sorkar Jylla kaba long T.1100 bad T.900 na ka Sorkar Pdeng.
Haba kylli, ka la iathuh ba ka Union ka la dawa ba ka Sorkar kan ai ia ka Identity Card, ban siew ia ka bainong baroh 12 bnai, ban siew ia ka Honorarium manla u bnai bad ban ai shuti ha ka por ba ki nongshet ja sngi ki pang.
U Adviser jong ka Union Bah KL Pariat u la iathuh ba ka Union ka la dawa ruh ia ka Sorkar ban pyntreikam ia ka shuti Maternity Leave ne ka shuti kha khunlung namarba bun na ki nongshet ja sngi ha ki skul ki dei hi ki kynthei.
“Ngi la iakren ban siew manla u bnai namarba ki nongshet ja sngi ki shet naduh ka lah sngi U Blei haduh ka sngi thohdieng bad ba ia pisa dei ban pynpoi ha ka Bank Account. Baroh ki Head Teacher ne ki Headmistress jong ki skul ki dei ban pynshlur ia ki nongshet ja sngi ban plie ia ki Bank Account. Bun ki bym pat pyntreikam ban pynpoi ia ka pisa ha ki Bank Account khamtam mynshwa leilei ka pisa ka poi sha ki nongshet ja sngi tang arsien ne lai sien ha ka shi snem,” u la ong.
