Shillong, Rymphang 20: Uwei u heprit ba la tip kyrteng u Kitborlang Marbaniang uba la 10 snem ka rta na ka shnong Umtangar ha Ri-Bhoi u la shah pynïap dusmon ha ki runar bym lah satia ban ithuh ha kawei ka jaka ba long khlaw hajan kane ka shnong.
Kane ka la jia ha ka 18 tarik mynta u bnai ha kaba la lap ïa ka met jong u heprit ha ka por 7:00 baje eiei janmiet.
Une u heprit u dei uba dang pule ruh ha ka Class-II ha kawei ka LP School ha ka shnong Umlur bad u dei ruh u khun ba saw napdeng ki 7 ngut ki khun jong u Bah Synshar Nonghyndah bad ka Kong Diona Marbañiang.
U Kpa, u la ïathuh ba u heprit Kitboklang u la mih na la iing ha ka sngi Saitjaiñ bad la ki paralok hynrei um shym la wanphai shuh sha la ing hynrei dei tad ha ka sngi u Blei ba la lap ïa ka met jong u na kawei ka khlaw hajan kane ka shnong ryngkat ki dak mong ha ka durkhmat.
Ki Pulit jong ka Patharkhmah Police Station kiba la ioh jingtip halor kane ka jingjia, ki la leit ban pynlong ia ka jingtohkit bad ban pynkit noh ïa ka met jong u sha Nongpoh, Civil Hospital ban leh ïa ka Postmortem. Hadien ladep leh ia ka Post Mortem la aiti noh ïa ka met sha ki bahaiing hasem ha ka Lah Sngi u Blei ban pyndep ïa ka jinglehñiam ba khatduh.
Ki kmie ki kpa ki la mudui da ka ejahar ha Patharkhmah Police Station bad ki Pulit mynta ki dang pynlong ia ka jingtohkit kaba bniah ban lap ksai ia ki runar kiba donkti ban dkhat jubor ia ka jingim jong heprit Kitborlang.
