Shillong, Nailur, 22: Ka seng kieng atiar Hynñiewtrep National Liberation Council (HNLC) ka la kynnoh ba ka tnat Pulit ka la shu pharep khlem nongrim ban pynjah burom ïa ka kyrteng jong u Bah Sromwell Mawdoh shwa ban long ka elekshon MDC da kaba kam ba u dei u dkhot jong ka HNLC.
Kane ka la wan hadien katto katne sngi ba u Bah Mawdoh u la shah kem na ïing sah jong u na Umpling, Shillong halor ka jingkynnoh ba u dei uba donkti ban lum pisa ba la dawa na ki heh saipan.
Ki Pulit ki la pyntip ba u Bah Mawdoh, uba dei u Headmaster barim jong ka Laishnong Secondary School, Mawlangsu, West Khasi Hills, u la phla ba u dei u nongbat ïa ka pla tyngka ne u Treasurer jong ka HNLC.
Haba kyntait ïa kane ka jingkam jong ki Pulit u General Secretary cum Publicity Secretary jong ka HNLC u Bah Saiñkupar Nongtraw ha u kyrwoh ba la phah sha ki lad pathai khubor ha ka sngi u Blei u la ong, “ka jingkynnoh pyrshah ïa u Bah Mawdoh da ki Pulit kim lah ban pynshisha bad ngi kyntu ïa ki bor ba dei peit ban sei da ki sakhi sabut kiba biang ban pynskhem ïa ka jingkam jong ki ba u Bah Mawdoh u dei u dkhot jong ka HNLC.
“Nga la ïohi na ka jingkynthoh jong u ha ka Facebook bad na kiwei kiwei ki tyllong jingtip ba u Bah Mawdoh u la pynpaw shisha ba u da angnud ban ïakhun ïa ka elekshon MDC ka ban sa long. Ka tnat Pulit ka kwah ban pynïap bad ban pynjah burom ïa u Bah Mawdoh ha ki lad pathai khubor ban pynpaw ba u dei u ksuid hashwa ka elekshon MDC. Ki jingleh jong ka tnat Pulit, ban pynjah burom ïa ka jinglong jong u Bah Mawdoh da kaba kynnoh lamler ba u don ka jingïadei bad ka HNLC, ka long kaba pynkhuslai,”ong u Bah Nongtraw.
U la bynrap, “ka HNLC ka kwah ban pynshai ba u Bah Sromwell Mawdoh um dei satia u dkhot ba la pyndem wait jong ka HNLC. Ha ka jingshisha u la shah kem ha u bnai Jylliew, 2015 kum u dkhot bapura ka HNLC. Ha ka jingkem kaba ar na ka iing sah jong u, ki Pulit ki la pynngat ïa u kum u nongtrei barieh (Over Ground Worker) jong ka HNLC.”
Shuh shuh u Bah Nongtraw u la takraiñ ïa ka tnat Pulit namar ka jingleh kum ka kynhun runar, da kaba pynlong sohpdung ïa ki samla ha ka kyrteng jong ka aiñ. Ha ka jingshisha ki dei ka kynhun ki riewshukor, ki menthok, ki nongpynïap briew, bad ki nonglamler, u la ong.
U la bynrap, “ha u snem 2010, haba u Bah Paristone Pakyntein ba ju khot sin Pudo u la shah kem ha ki shipai BSF, ka Pulit jong ka Meghalaya ka Kong Jyoti Wahlang ka la leit ïakren bad ki ophisar ka tnat shipai BSF da kaba kyrpad ban aiti ïa u Bah Pakynteiñ sha ka tnat Pulit. Ka la ai jingmut ruh ïa ki shipai BSF ban ym pyllait kyrwoh sha ki lad pathai khubor, hynrei ka tnat Pulit hi kan sa leh lut nadong shadong namarba ki dei kiba tbit ha kine ki kam namarba ki tbit bha kumno ban ai musli musla, da ki 12 tylli ki jait. Da ka jingtbit jong ki ban khleh musli musla ka tnad Pulit ka lah ban pyndonkam ïa ki buit kum ka jingpynbna ne jingpynbor ban pynkhih bad pynduh mynsiem ïa kano kano ka kynhun ne ïa ki briew ha ka por ba la kem.”
Une nongïalam ka HNLC shuh shuh u la pynbna ba ka jingwan phai jong u Bah Emanuel Suchen, uba dei na ka kynhun jong u snem 2003 bad uba tbit bha ha ki kam pyntbei bom, na ka bynta ka seng, bad maham ruh ba ka Sorkar kam dei ban kheiñ troiñ ïa ka bor jong ka seng.
“Ha ka por ba u Bah Emanuel Suchen u la don ha Mawiong, u Justice T. Vaiphei u la leit jngoh ban tohkit ïa u shaphang ka jingkynnoh donkti jong u Bah Che ha ka jingpynbthei bom IED ha rilum Jaiñtia bad ha Laitumkhrah. U Bah Suchen u la pynthikna ha u Vaiphei ba u Bah Che um dei satia uba donkti ha kane ka jingjia,” u la ong.
“Hadien kane, lai ngut ki Myntri Sorkar, u Conrad Sangma, u Bah Prestone bad u Bah Lakhmen Rymbui da lade hi ki la leit ïakynduh markhmat ïa u Bah Suchen ha Mawiong bad ki la tohkit bniah la u Bah Che u dei shisha neem uba donkti ha ka jingpynbthei bom. Wat hapdeng ka jingkyntait jong u Bah Suchen, kine ki Myntri Sorkar ki la pynbor ïa u ban phla thok pyrshah ïa u Bah Che. Kum ka bainong na ka bynta ka jingkohnguh jong u, ki la kular ban aikam ïa u bad ban ai ruh da ka pisa.
“Ka paw shai na ka jingpyrshang jong ka Star Cement ban leit ïakynduh ïa u Emmanuel bad ban tyrwa kam ïa u ka pynpaw ba ka don ka jingïadei kaba jan bha hapdeng ka Sorkar Jylla bad ka Star Cement,” u la ong bad bynrap “hadien ba la pyndem wait, ïa u Bah Emanuel la rah sha Mawiong, ha kaba u SP Jagpal Singh u la wan poi, u la byrngem ïa ka jingim jong u Bah Emanuel, bad la pynshitom beiñ ïa u kat haduh ba un da mynsaw bad mad ïa ka jingshitom. Hadien ka jingshah set kaba lai bnai ha Mawiong, ka NIA ka la pynkynriah noh ïa u na phatok Jowai sha Delhi ban tohkit, ha kaba u la mad ïa ka jingshah pynshitom beiñ da ka third-degree. U Bah Emanuel u la mynsaw jur na ka bynta jong u ryndang, ki shympriah kti bad ka syngkai jong u.”
“U (Bah Emanuel) mynta u la wan phai biang sha ka HNLC bad u dang don mynta hapdeng ka jingshah sumar, bad ngi kyrmen skhem ba un ïoh ïa ka jingkoit jingkhiah kham kloi,” la ong shuh shuh u Bah Nongtraw.
U Bah Emanuel Suchen, u dei u dkhot jong ka HNLC na ka kynhun jong u snem 2003, uba donkakor, uba tbit ha ka jingpyndonkam ïa ki tiar pynbthei bad uba skhem ban aiti lut na ka bynta ka dawbah jong ka jaidbynriew Hynñiewtrep,” la ong u Bah Nongtraw.
