Shillong, Nailar, 03: Ki kmie ki kpa jong ki khun kiba pule ha JNV Mawphlang ha ka sngi Saitjaiñ ki la dawa ba dei ban pynkynriah kam noh mardor ïa ka Pricipal jong ka JNV Mawphlang, East Khasi Hills District bad ban wanrah noh da kawei/uwei u/ka Principal uba/kaba lah ban peit ïa ka jingshngaiñ jong ki khynnah kiba pule ha kane ka skul.
Kane ka jingdawa jong ki kmie ki kpa ka long khyndiat sngi hadien ba u Nathaniel Sohtun, u khynnah uba pule ha JNV Mawphlang u la duhei ïa la ka jong ka jingim na ka daw ka jingshah bat ha ka bording ilektrik.
Da ki spah ngut ki kmie ki kpa jong ki khynnah kiba pule ha JNV, Mawphlang ki la ïakynduh lang ha Dorbar Hall Mission Compound ha kaba ki la thaw ïa ka Komiti ka ban peit ïa ka jingbha jingmiat jong ka skul bad kumjuh ruh jong ki khynnah.
Ki nongkitkam jong ka komiti ki kynthup ïa u Chairman Bah Binestar Ksanlah bad General Secretary ka Kong Kellinda Kharsati.
Ha ka jingïakren bad ki lad pathai khubor hadien ba la wai ka jingïalang, u Bah Binestar Ksanlah u la ïathuh ba ka jingïalang ka la rai ban dawa ba dei ban pynkynriah kam noh ïa ka Principal ba mynta jong ka JNV Mawphlang bad ban thung noh da kawei kaba lah ban trei na ka bynta ka jingshngaiñ jong ki khynnah skul.
“Ka jingjia kaba mih ha JNV Mawphlang ka dei namarba ka Principal kam don ïa ka jingkitkhlieh ïa la ka jong ka kamram ba ka bat. Ngi ïohi ba ka jingïadei jong ka bad ki khynnah skul ruh kam don bad kam don ruh ka jingkitkhlieh ïa ka bit ka biang bad ka shong ka sah jong ki khynnah watla ki khynnah ki la leit ban ud ïa ki jingeh jong ki, hynrei ka Principal kam ju pdiang satia,” la kynnoh u Bah Ksanlah.
“Dei na kata ka daw, wat lada ka bording ka thud bad ki waïar elektrik ki don jingma ïa ki khynnah ruh kam salia, kam don ïa ka jingkitkhlieh. Ngi ïohi ruh haba une u khynnah (Nathaniel Sohtun) u la duhei ïa la ka jong ka jingim, ngi la don ïa ka Parents-Teachers Committee ba la ïalam da ka Principal hynrei ïa ngi ki dkhot ba la phah da ki kmie ki kpa ba ngin ïadon ryngkat bad ka ha kino kino ki jingdonkam wat haduh kat kine ki jingjia ruh kam shym la khot ïa ngi haduh kine ki sngi ba ngin ïoh ïa ka jingïasyllok lang,” la ïathuh u Bah Ksanlah.
“Ha ki por baladep tang shu don kino kino ki jingjia barit baria ka Principal ka ju lum kloi kloi ïa ka jingïalang ki Nonghikai bad ki Kmie ki Kpa ban ïasyllok hynrei kaba phylla ka long ba wat une u khynnah u la duh ïa la ka jong ka mynsiem ruh ka Principal kam khot satia haduh mynta mynne,” u la ong shuh shuh.
“Kane ka la pynpangnud ïa ngi ki dkhot ba la jied da ki kmie ki kpa ban mihkhmat sha ka Komiti bad dei na kata ka daw mynta ka sngi ngi la lum ïa ka jingïalang ban leh eiei na ka bynta ka bit ka biang jong ki khynnah,” u la bynrap.
U la ïathuh ba tang shu ïoh jingtip halor ka jingjia ba sngewsih jong u Nathaniel Sohtun, mar mar ki dkhot ka Komiti ki la leit bran bran sha JNV Mawphlang bad ban ïakynduh ruh ïa ki kmie ki kpa bad synran ruh ïa ka iing ka sem ha ka sngi leit ontep.
