Shillong, Lber 03: Ka Karbi (Mikir) Traditional Faith (Religion) Association (KTFA) ha ka sngi U Blei ka la pynshai ba kam donkti kti satia halor ki jingshah kynnoh ba ka don ka jingtah Poster ha ka shnong Marmaiñ, Ribhoi District, ka shnong kaba don ha khappud ka jylla Meghalaya bad Assam.
Kane ka jingpynshai jong ka KTFA ka long hadien ba u MLA ka Nongpoh u Bah Mayral Born Syiem dang shen u la rah ha Iing Dorbar halor ka jingshong syier jong ki paidbah ha ka thaiñ Marmaiñ halor ka jingkynoh ba ka don ka jingbyrngem jong ki kynhun kiba bthah ia ki bor pyniaid jong ka Sacred Heart Secondary School, Marmaiñ ban weng ia ki dur niam na ka skul.
Ha u kyrwoh ba la phah da u President bad u Secretary ka KFTA, ka ong, hadien ba la ïohsngew na ka Social Media ki la pyrshang ban wad jingtip hapoh ka shnong bad ha ki jaka ba marjan hynrei kim shym la lap sabut eiei ruh em ba ka don ka jingtah poster hapoh shnong ne ha kano kano ka jaka.
“Ngi sngewdei ban pynshai ba ka khubor ka long ban ïalam bakla bad ngi kyrpad ia ki nongshong shnong jong ka jylla baroh kawei ba kim dei ban sngewthuh bakla halor kane,” ong ka kyrwoh.
Halor ka jingsaphriang jong ka Voice Mail, ki nongïalam ka KTFA ki la kam ki la pyrshang ban wad jingtip bad kim shym la lap ia kano kano ka sabut ba la don kum kata ka jingkren ha ka voice mail.
“Ha kaba ïadei bad ka jingkynnnoh ba la phah weng ïa ki stashu na ki iingskul kam long kaba shisha bad ym shym la don satia kaba kum kata ka rai. Hynrei ha ka jingïalang ha kato ka sngi ka long tang ka jingïasyllok haba shit haba shai hakhmat ki paidbah kumno ban pynneh pynsah ïa ka jingngeit niam tynrai sha kine ki thaiñ,” la pynshai ka KTFA.
Haba pynshai halor ka jingkynnoh ba don ka jingïadei bad ka seng Sanmilato Samatan Samaj na Assam, ka KTFA ka la pynshai ba kam don jingtip ne jingïadei eiei ruh em shaphang ka SSS na Assam hynrei ka dei tang kaba la shu ïoh sngew na ka Voice Mail.
Halor ki dur niam tynrai (Traditional Symbol), ka KTFA ka la kam ba kam don kano kano ka jingtuklar ne ka jinghukum ban phah weng, hynrei la shaniah ha ka bor jong u Syiem Hima Dumura (Doomora), kum u Syiem ban pynbeit ïa kane ka kam.
Ha kaba iadei bad kane, ka KTFA ka kyntu ïa ki bor synshar ka Ribhoi District ba lada don ki jingpyndik, ki bor ka aiñ ki dei ban leh ïa kaba donkam bad kum ka kynhun ki kular ban ai ia ka jingïatrei lang bad ki bor pynïaid distrik bad ban ym ailad ïa kino kino kiba thaw jingkulmar hapoh ka shnong ka thaw.
