Shi spah snem mynshuwa, ha u ‘nai Lber ka snem 1924, uwei u pukir Khristan uba don nam ka Ri India, u Sadhu Sundar Singh, u la wan ïaid pilgrim sha ki Lum Khasi. Ka jingwan jong u ka long ban ïalap bad ïasam lem ïa ka Gospel bad ïa ka jingshem mynsiem jong u hapdeng ki paid Khristan kiba don ha Ri Khasi. Ha kane ka jingthoh, nga ai khublei kyrpang ïa kine ki rangbah, kita, Babu Horju Roy Khongwir, Capt. H. Lyngdoh, Babu Joel Gatphoh, Babu Kubur Singh bad Rai Sahit D. Ropmay kiba la pynshitom ban buh ha ka jingthoh ïa kane ka jingwan jngoh. Kine ki rangbah ki la pynkylla Khasi, ki la lumthup shi jaka bad pynmih ïa ki jingïalap ktien Blei jong u Sadhu Sundar Singh kiba u la kren ha ki Balang bapher ha Ri Khasi bad ha ki jingïaseng paidbah jong ka Presbyterian Assembly ha ka snem 1924.
Ban rakhe kynmaw ïa ka jingdap shi spah snem jong ka jingwan jngoh jong u Sadhu Sundar Singh, nga wanrah sha phi ki nongpule ïa kane ka jingthoh shaphang une u pukir Khristan ka Ri India bad ïa kane ka jingthoh la pynshong nongrim ha ki kot ki sla kiba lah ban shem. Ka long ruh kaba sngewtynnad ba nalor u Sadhu Sundar Singh, ki don sa kiwei pat ki riewkhraw kiba la wan jngoh bad pynlong Ïing ha Ri Khasi, kaba kynthup ïa u myllung ka Bengal, U Rabindranath Tagore uba la wan ha ka snem 1919, u nongïalam jong ka Indian National Army, u Subhas Chandra Bose uba la ïuh kjat ha ka snem 1927 bad 1938. Nangta, u scientist uba khraw, u C.V Raman, uba la shong bad thied ïa ka Ïing ne ka “Rao Bhavan” ha Kench’s Trace ha ki snem 1920.
Ka Shillong bad ka Ri Khasi ha ki snem 1920:
Ha ki snem 1920 ka Ri Khasi ka hap hapoh ka jingsynshar jong ki British bad la kynthup ïa ka hapoh ka Assam Province. Katkum ka khanasamari jong ka snem 1921, ka jingdon ki paid Khasi bad Synteng (kumba la kdew ha ka kot Census 1921) ha Assam ki long baroh 124,053 (shi lak ar phew saw hajar bad san phew lai) ngut. Ka paw ruh ba ka don ka jingkiew ha ka jingdon ki Khristan bad ka long ar shah ha ki shi phew snem, kata 1911-1921. Ha ka snem 1924, ka jingdon ki dkhot ka Balang Presbyterian ha Ri Khasi-Jaiñtia ka long 37,693 (lai phew hynñiew hajar hynriew spah khyndai phew lai) ngut. Ha ki snem 1920 la sakhi ïa ka jingkylla kiba bun ha ka Ri Khasi bad ka jingkiew rasong ka Balang Khristan kaba la suh thied lynga ki skul, ki hospital bad ki kam ïalap.
Katkum u K.D Saha, “ha ka por ba ka Assam ka ïasoh bad ka Sorkar Bilat ha ka snem 1826, ka Sorkar British ka pyrkhat ban pynïasoh ïa ka Sylhet bad ka them jong ka Brahmaputra lyngba ka Khasi bad Jaiñtia Hills…bad u David Scott, uba long u agent jong ka Sorkar Company na Bilat, u la thaw ïa ka surok lyngba ka Khasi-Jaiñtia hills. Shuh shuh ha ka snem 1862, la thaw ïa ka committee ban wad ïa ka jaka kaba biang tam ban pynlong kum ka jaka pdeng ne ka nongbah. Nalor ki jaka kiba bun, ka Committee ka shem ba ka jaka kaba ki khot mynta ka Upper Shillong ka long kaba bit ban pynlong kum ka jaka treikam na ka bynta ki kam paidbah bad ka jaka ha Ïewduh kan long ka jaka ban buh ïa ki shipai European kiba la shong thait ne ki bym lah shuh ban trei bad ïa ki len shipai. Kumta ha ka snem kaba bud, ha ka 1863 ka Sorkar British ka la soi ïa ka Sorkular ne ka Dulir bad U Syiem Mile Sing jong ka Hima Mylliem. Lyngba kane ka Soskular ka Hima Mylliem ka la ai ïa ki katto katne ki jaka raij kaba la tip kum ka Shillong Land, Nongkseh Land bad Shillong-Laban Land sha ka Sorkar British. Ñiuma, ki don ruh ki Ri kynti kiba ka Sorkar British ka la shu thied na ki trai khyndew”.
Ka jingroi bad jingïar jong ka Shillong ka la sdang naduh ka snem 1874. Ka long kaba dei ban kynmaw ba ha ka snem 1874 ka Sorkar British ka la pynmih ïa ka jingpynbna paidbah ha ka 6 Rymphang bad 12 Nailar ba la phiah ïa ka Assam na ka Bengal bad thaw ïa ka Province kaba thymmai, kata ka Assam Province hapoh ka jingkhmih jong u Chief Commissioner kum u khliehduh. Kumta kum ka Nongbah jong ka Province bathymmai, kha ma kha ka Shillong ka la kylla long ka ïing bad ka shnong bah jong ki jaitbynriew kiba pher kiba la wan buhai shnong kum ki babu sorkar, katba kiwei pat ki wan kum ki nongkhaïi bad ki nongbylla ban kamai jakpoh. Nalor ki trai muluk hynñiewtrep, kiwei pat ki jaitbynriew kiba la wan buhai shnong ha Shillong naduh kitei ki snem ki long ki Assamese, Bengalee, Bihari, Nepali, Rajasthani, Punjabi bad kiwei.
Ha khanasamari jong ka Sorkar la kdew bad shat phalang ïa ka jindon bad jingsaphriang ki jaitbynriew bapher kiba shong shnong ha Nongbah Shillong.
Nalor kiwei ki jaitbynriew, nga kwah ban kdew hangne ïa ka kynhun jong ki Mazhabi ne Dalit Sikh, kiba long ka kynhun kaba la wan shong trei ha Shillong na ka bynta ban pynkhuid ïa ka jaboh jabaiñ jong ka Nongbah bad ki jakhlia kiba mih na ki tyngkong ïing jong ki nongshong shnong. La ju tip ïa kine da ki nongsar surok, ki nongpynkhuid bad nongkit ïa ka jakhlia ne ki metor jong ka Shillong. Ym lah ban tip thikna ïa ka snem ne ki snem ba ki wan buhai shnong nyngkong eh, hynrei kane ka kynhun jong ki Mazhabi Sikh ka la wan ban shakri ïa ka Nongbah naduh ka por jong ka Sorkar British.
Ha ka article, “The Sweepers of Shillong”, kaba la pynmih da ka tnat Anthropological Survey of India 1979, u Jayanta Sarkar u la batai da ki dak jingkheiñ halor ka rukom wan buhai shnong bad nangno kine ki Mazhabi Sikh ki wan? Ka paw shai kdar ba ki Mazhabi Sikh ki dei kiba wan na ki ar tylli ki District ka Jylla Punjab, kita ki long ka Amritsar bad Gurdaspur. Ka jingshem lanot jong kane ka kynhun ki Mazhabi Sikh kiba dei ruh ki jait kiba poh bad kiba trei ïa ki kam pynkhuid jakhlia ka ïai bteng haduh kine ki sngi. Kumba u Himadri Banerjee u kynthoh, ba kine ki Mazhabi Sikh ki im bad ki shong ki sah ha ki jaka kiba sma iw tung, kiba jakhlia, ka bym koit bym khiah bad ka bym bit ban shong briew. Wat la ki la shong shnong la palat spah snem ha ka Nongbah, pynban la ñiewbeiñ ïa ki kum ki riewpoh bad ki nongwei. Ha pyrshah jong kane ka jinglong jingman, nga la pule ïa ki sermon jong u Sadhu Sundar Singh kiba u la sam ha Ri Khasi bad ïa ka jingshem mynsiem jong u kum u pukir Khristan.
U Sadhu Sundar Singh ha Ri Khasi
Ym shym la shem ki jingthoh kiba ïathuh ba U Sadhu Sundar Singh u la ïakynduh ne ïalap ktien Blei hapdeng ki Punjabi/Sikh kiba don ha Ri Khasi, khamtam ha Shillong, wat la ha ka por ba u don u Shillong, u Sadhu u shong u sah ha kawei ka ïing ha Mawkhar, ka jaka kaba tang shi pda maw na ka them Ïew Mawlong, ka jaka kaba ki Mazhabi Sikh ki shong ïing. Lah ban ong ba u Sadhu u tip ïa ka jingdon jong ki namar ki dei ki nongtrei, ki nongpynkhuid bad nongkit ïa ki jakhlia na ki shnong kiba hap hapoh ka Shillong Municipality, kaba kynthup ïa ka shnong Mawkhar, Laban bad kiwei.
Ka jingwan jong u Sadhu Sundar Singh sha Ri Khasi, ka sdang da ka jingïathoh shithi hapdeng jong U bad u Babu Joab Solomon, u tymmen basan jong ka Balang Presbyterian Mawkhar, Shillong. Haba jubab ïa ka shithi jong u Babu Joab Solomon kaba u la thoh ha ka 26 June 1923, U Sadhu Sundar Singh u la pynpaw ïa ka jingthrang ban wan jngoh ïa ka Ri Khasi bad u thoh kumne- “Ko Parabangeit ha U Trai, Nga ainguh shibun na ka bynta ka shithi jong phi ba phi phah ha u June 26. Nga dang shait bha da ka jingisynei u Trai…Lada U Blei un ibit, ngan pyrshang ban wan sha Shillong ha kane ka snem ka ban dang wan. Phi sngewbha ban ai ka jingkhublei jong nga ha ki para Khristan ha baroh ka Ri Assam, shynrang bad kynthei bad ong ïa ki ba nga kyrmen ban ïashem bad ki ha kane kawei ka snem…”
Katkum ki jingthoh, U Sadhu Sundar Singh u la poi ha Ri Khasi ha u bnai Lber 1924 bad nyngkong eh u la sam ïa ka ktien Blei ha ka jingïaseng miet ha Balang Mawkhar ha ka 7 March. Ha ka snem 1968, u Babu Wilson Reade, tymmen basan ka Balang Presbyterian Mawkhar, u la ïathuhkhana na ka bor kynmaw ïa ka jingïaseng pdiang burom ïa u Sadhu Sundar Singh ha ka Balang Mawkhar bad ha kata ka por ka Ïingmane ka dang heh bun shah ïa ka jingdon ki dkhot ka Balang, hynrei ha kata ka miet ka Ïingmane ka la dap smam da u paidbah uba la wan ban sngap ïa ka jingïalap jong u Sadhu. La ïathuh ba ka longïing jong u Babu Joab Solomon ha Mawkhar ka la pdiang bad ai jaka shong basa ïa U Sadhu Sundar Singh mynba u don ha Shillong.
U Sadhu Sundar Singh u la leit kylleng ka Ri Khasi bad u la kren ‘tien Blei ha kiba bun ki Balang bad ki jingïaseng bah jong ka Assembly kaba la long ha Mairang ha ka snem 1924. Kine ki long ki Balang bad ki jaka ba U la kren ïa ka Ktien Blei- (a) Ha Balang Presbyterian Mawkhar Shillong ha 7th, 8th bad 9th March (b) Ha Balang Presbyterian Laitkynsew ha 10th March (k) Ha Sohra ha ka 11th March (d) ha Shillong ha ka 12th March (e) Ha ki jingïaseng Assembly kaba long ha Mairang naduh 14th haduh16th March (g) Ha Balang Presbyterian Laitumkhrah ha ka18th March bad (ng) Ha Balang Presbyterian Mawphlang ha ka19th March.
U Sadhu Sundar Singh u dei u pukir Khristan na Ri India uba la paw nam ha ka dew bah Asia bad kylleng ka pyrthei. Une u Sadhu u la aiti ïalade bad len lade na ka bynta ka Gospel U Khrist. U long ruh u nonghikai uba kynja mynsiem bad ki jinghikai jong u ki long shaphang ka jingieid bad jinglong kawei hapdeng ki para bynriew. La kha ïa u ha Punjab ha ka snem 1899 ha ka longïing kaba bat pyrkhing ïa ka niam Sikh, pynban hadien u la kylla Khristan ïalade. La thoh kumne, “U Sadhu Sundar Singh u phla paidbah ba dei u Mysiem Bakhuid uba pynkylla Khristan ïa U, katba ka dei ka kmie jong u pat kaba btin lynti bad hikai ïa U ban kylla long U Pukir ne Sadhu. U phla ruh ba ynda un poi ha Bneng un wad shuwa ïa ka kmie bad lada jia ba um shem ïa ka un ym shongduh hangta, hynrei un kyrpad ïa la U Kynrad ba un îalam ïa u sha ka jaka ba don ka kmie…”
Ha ka jingim bad jingïaid lynti jong U ban ïalap ‘tien Blei u la mad shibun ki jingshem bad ki jingleh phylla jong U Blei bad u don ruh ka jingtip-jingshemphang halor ki niam ne jingngeit tynrai kiba la suhthied ha Ri India. Ki jingkren ‘tien Blei jong u ki long kiba jylliew, kiba synlar, kiba shai bad kiba suk ban sngewthuh da ki paidbah ne ki riewmadan. Ki nuksa ne jingïathuh khana kiba u ju bynrap ha ki jingkren jong U, ki long kiba kordor namar u ju ring dur na kiei kiei kiba U mad bad ïohi ha ka jingim. Ki Lum Makashang ki dei ki paralok bad ki lum sop ïor ki dei ki jaka shongthait jong U, katba ki krem ktah kiba pjah tasam ki dei ki jaka ba u ju ïasyllok bad u Trai Kynrad.
Ka jingduwai bad ka bor jong ka, ki long ka subject pdeng jong ki jingïalap ‘tein Blei jong U Sadhu. Ha U ka jingim ba dap kyrhai ka thew ïa ka jingim kaba ïoh ïa ka bor ban ïeng skhem ha ka nongrim, ban ïakhun bad ban jop hapdeng ki jingtynjuh kiba bun. U Sadhu Sundar Singh u dei u pilgrim uba thrang ïa ka Hok, ka Jingshisha bad ka Jingsuk kaba janai.
