New Delhi, Jylliew, 04: Ka jingduna jong ka BJP ban ioh ia ka jingbun paid ha ka Ingdorbar Thawain Lok Sabha, u Myntri Rangbah ka Jylla Bihsar u Nitish Kumar u la long mynta kum u ‘kingmaker’ ha kaba ka seng sainpyrthei jong u, ka Janata Dal (United), ka la jop 12 seat ha ka elekshon Lok Sabha ba la niew vote ha ka sngi Baar.
U Nitish Kumar u dei ruh uwei na kiba la don bynta ban pynkha ia ka INDIA Bloc ryngkat ka jingiatreilang ka seng Congress, TMC bad kiwei kiwei ki party. U Nitish u la phet noh sha ka NDA ba la lamkhmat da ka BJP hadien ba la mih ka jingiapher jingmut ha ka kynhun India Block.
Ka JD(U), kaba iakhun na ki 16 tylli ki Seat hapoh ka shatri jong ka National Democratic Alliance (NDA), ka la jop sa ar tylli ki seat na kaba la khmihlynti. Da kane ka jingjop, u Kumar u la long u nongialam sainpyrthei ba ki khmat baroh ki phai sha u.
Sa uwei pat u dkhot jong ka NDA u dei u Chirag Paswan uba ialam ia ka Lok Janshakti Party (Ram Vilas) kaba la jop san seat.
U nongialam jong ka Rashtriya Janta Dal (RJD) u Manoj Jha uba long ruh u MP ka Rajya Sabha u la pynkynmaw ba kumno u Kumra u la leh ia ka bynta kaba kongsan tam ha ka jingpynkha ia ka INDIA bloc ba la lamkhmat da ka Congress ha kane ka elekshon Lok Sabha.
“Ngi la thaw ia ka kynhun bad u Nitish Kumar. Ngi tip ba u ju pynsngew ia ki jingbym sngewiahap ia ki jingleh donbor ha ka sainpyrthei da ka BJP,” u la ong. Dang khyndiat sngi, u nongialam jong ka RJD u Tejashwi Yadav u la ong ba kan sa jia ka jingjia kaba khraw ha ka sainpyrthei ha Bihar hadien ka jingniew vote jong ka elekshon Lok Sabha.
Ki nongialam jong ka JD(U) ki iathuh ba ka party kan iaineh beit bad ka NDA bad kan sa leit ban iashim bynta ruh ha ka jingialang jong ka NDA ka ban sa long ha Delhi ha ka 5 tarik mynta u bnai.
Na ki 40 tylli ki seat ha Bihar, ka paralok jong ka NDA ka Rashtriya Lok Morcha ba la lamkhmat da u Upendra Kushwaha ka la shah pynliem ha ka Karakat Seat, katba u nongialam ka Hindustani Awam Morcha (Secular) u Jitan Ram Manjhi u la jop na Gaya (reserved) Seat da kaba pynliem ia uba iakhun pyrshah u Kumar Sarvajeet uba la pynieng da ka RJD.
Ha kane ka elekshon Lok Sabha ha Bihar, ka Janata Dal (United) ka la jop 12 seat, ka BJP ka la jop 12 seat, ka Janshakti Party(Ram Vilas) ka la jop 5, ka Rashtriya Janata Dal ka la jop 4 seat, ka Congress 3seat, ka Communist Party of India (Marxist-Leninist) (Liberation) 2 seat, ka Hindustani Awam Morcha (Secular) 1 seat bad Independent 1seat.
