Shilong Jylliew 04: Ka National People’s Party kaba bat ia u lakam synshar ha ka jylla ka la mad ia ka jakhom khait hadien ba ki arngut ki kyrtong na Shillong bad na Tura ki la shah pynliem lyndang ha ka elekshon Lok Sabha ba la niew vote ha ka sngi Baar.
Ka Sitting MP jong ka Tura ka Agatha K Sangma bad ka Dr. Ampareen Lyngdoh kaba la long ruh ka Myntri Sorkar ka Jylla bad ka kyrtong na Shillong ki la mad ia ka jingshah rem ha kane ka elekshon.
Ha Shillong, u Dr. Ricky AJ Syngkon na ka Voice of the People Party u la pynrem ïa u Sitting MP u Bah Vincent H. Pala na ka seng Congress da kaba tam haduh 3.7 lak ki vote, kaba dei ka jingjop kaba tam bun bha kaba la don ha ka jylla.
U Dr. Syngkon u la ïoh palat 5.68 lak ki vote bad u la long u namtam ha ka jingiakhun bad pynliem ruh ia ka kyrtong ka NPP ka Dr. Ampareen Lyngdoh, ia u kyrtong ka UDP Bah Robert June Kharjahrin, bad ia ki arngut ki kyrtong shimet ba kynthup ia u Prof. Lakhon Kma bad ia u Bah Peter Shallam.
Ki paidbah kiba thep ha u NOTA ki long 11008 vote.
Ha Tura, ka Agatha ka la shah pynliem ha u kyrtong jong ka Congress u Saleng A. Sangma uba la tam haduh 1.55 lak vote na ka jingdon kiba nong thep vote haduh 6.74 lak ngut.
Ka Agatha ka la ïoh 2.28 lak vote na ka Tura Lok Sabha Constituency kaba don 24 tylli ki Assembly Constituency.
Ha u snem 2019, u Bah Pala u la ïoh 53 per cent na ki vote (4.19 lakh) na Shillong Seat katba mynta ka kynti u Dr. Syngkon u la ïoh 58 percent na ka jingdon jong ka vote.
U Nongïalam ka National People’s Party bad u Myntri Rangbah ka jylla u Conrad K Sangma haba kren ha ka rynsan X u la ai khublei ïa ki arngut ki MP kiba thymmai na Meghalaya, kata, ia u Saleng A. Sangma bad ia u Dr Ricky Syngkon.
U Conrad u la ong, ‘ngi pdiang ïa ka rai jong ki paidbah bad nga ai khublei ïa u Saleng A Sangma bad u Dr. Ricky Andrew J. Syngkon ba kin lah ban trei bha ha kane ka kam kaba thymmai.”
