Shillong, Jylliew, 04: Ka elekshon Lok Sabha kaba la long ha u snem 2024 ka la pynkyndit thret ia kiba bun balang ban tip ba ka iing ka sem jong u Purno A. Sangma (bam kwai ha dwar u Blei) kaba ju mihkhmat ia ka Tura Parliamentary Seat la 47 snem kynthih ka la mad ia ka jingshah rem ha kane ka kynti ha ka sien kaba nyngkong eh.
Ia ka Tura Parliamentary Constituency la mihkhmat nyngkong eh ha u snem 1971 da u KK Marak uba la jop na ka tiket jong ka All Party Hill Leaders Conference. Hadien san snem, kata ha u snnem 1977 ia ka Tura la mihkhmat da u Purno Agitok Sangma na ka Indian National Congress haduh u snem 1984. Hadien kane, naduh u snem 1988 haduh u snem 1990 u Purno u la wan phai sha ka jylla ban iakhun ia ka elekshon MLA ha kaba u la jop bad shah jied kum u Myntri Rangbah uba saw jong ka Jylla Meghalaya. Ha u snem 1989 ka Congress ka la sei bujli da u Sanford Marak uba la long u MP ha u snem 1989 bad 1991. Sa shisien biang u Purno A. Sanmga u la jop ia ka elekshon Lok Sabha naduh u snem 1991 ter ter haduh u snem 2005 kum u kyrtong jong ka seng Congress, kum u kyrtong jong ka Nationalist Peoples Party bad kum u kyrtong jong ka All India Trinamool Congress hapdeng kine ki snem.
Hadien ka jingwan phai biang sha ka jylli jong ka sainpyrthei ha ka Jylla u Purno u la jop biang kum u MLA ha u snem 2008 bad dei ha une u snem ba ka ing ka sem jong u Purno A. Sangma ka la pynieng da ka Agatha Sangma ha ka elekshon shiteng samoi kaba la jop na ka tiket jong ka Nationalist Peoples Party. Ha u snem 2009, ka Agatha ka la jop biang ia ka elekshon Lok Sabha tad haduh u snem 2014. Ha u snem 2014 u Purno A. Sangma u la iakhun biang ia ka elekshon Lok Sabha naduh u snem 2014 haduh u snem 2016 bad u la khladnoh na kane ka sla pyrthei ha ka 4 tarik, Jymmang, 2016. Ha u snem 2016, ia ka Tura Seat la mihkhmat sa u Conrad K. Sangma uba long u khun shynrang jong u Purno A. Sangma naduh u snem 2016 haduh u snem 2019 na ka National Peoples Party.
Ha ka elekshon MLA kaba la long ha u snem 2019, u Conrad K. Sangma u la wan phai noh sha ka jylli jong ka sainpyrthei bad ha une u snem ka NPP ka la pynieng biang ia ka Agatha Sangma ha ka elekshon Lok Sabha kaba la mihkhmat ia ka Tura Parliamentary Seat haduh u snem 2024 bad ha kane ka kynti ba la pynlong ia ka elekshon Lok Sabha ha u snem 2024 ka Agatha ka la shah pynrem noh ha u kyrtong jong ka Seng Congress u Saleng A. Sangma.
