Shillong, Nailur, 01: Ka National People’s Party (NPP) kaba bat ïa u lakam synshar ka la rai ban pynïakhun kyrtong na Shillong bad na Tura Parliamentary Seats ha ka elekshon Lok Sabha ka ban sa long ha u snem ban sa wan.
Ïa kane la pyntip da u State President ka NPP u Dr. WR Kharlukhi uba long ruh u MP ka Rajya Sabha MP. U la ong ba ka party mynta ka kynti kan ym kyrshan ïa u kyrtong monlang ban pynieng na Shillong Parliamentary Seat. “Ngin pynieng la ki jong ki kyrtong (na baroh ar tylli ki Seats) bad ngi kyrmen ba ngin jop ïa ka elekshon,” ong u Dr. Kharlukhi ha ka jingïakren bad ki lad pathai khubor ha ka sngi Thohdieng.
Ïa mynta, na Tura Parliamentary Seat la mihkhmat da ka Agatha A Sangma kaba long ka MP jong ka NPP katba na Shillong la mihkhmat da u nongïalam ka Congress u Bah Vincent H. Pala. U Dr. Kharlukhi shuh shuh u la ong ba ka party kam pat shim rai ban sei kyrtong na ka bynta ka Shillong Parliamentary Seat.
“Mynshwa ngi ju sei ïa u kyrtong monlang hapdeng ka UDP bad ka NPP hynrei ka result kaba mih ka long beit kumjuh. Mynta ka kynti, ngin ong, to ngin ïa pynieng la u jong u kyrtong khnang ba ngin pyrshang bad ban jop ïa ka elekshon. Balei ngin don tang kawei ka MP ha Lok Sabha, balei ym don ar ngut ki MP ha Lok Sabha,” u la bynrap.
Haba kylli, hato ka party ka la rai ne em ban ai tiket ïa u Nongaitktien ka BJP u Bah Himalaya Shangpliang uba long ruh u MLA barim ka Mawsynram Constituency, uba la rai ban pynïasoh shen bad ka NPP, u Dr. Kharlukhi u la ong, “ngin peit shwa, nga dang shu ïohi ïa kata, (ba un pynïasoh bad ka NPP) tang ha ki lad pathai khubor bad lada ka kam ka la urlong, ngin sa shim ïa ka rai.” Da kaba pynpaw ba ka NPP ka don tang khyndiat ngut ki MLA ha rilum Khasi bad Jaiñtia, u State President u la ong ba ka NPP ka la ïoh bun bha ka vote share ha ka elekshon MLA 2023.
“Lada ngi peit ba ngin jop ïa ka seat (Shillong)…palat 3 lak ngut ki nongthep vote ki la jied ïa ka NPP. Kata kaba donkam,” u la ong bad bynrap ba watla ka don lehse kano kano ka jingïashrut hynrei na ka bynta ka NPP ‘ngin sa ïa peit ïa ka result.”
Halor ka ishu khappud, une u MP jong ka Rajya Sabha u la ong ba ka Sorkar MDA ka la pyrshang katba lah ban ïakren pynbeit ïa u pud u sam. “………..namarba kam dei tang mynta, hynrei ka jia naduh ka por ba la pynkha ïa ka Meghalaya, la donam ban ïa/pynbeit khnang ba ki paidbah kiba sah ha khappud kin shongsuk shongsaiñ. Na kata ka daw ki la thaw ïa ki Regional Committee, kin sa shong bad kin sa leh ïa kaba bha tam,” u la ong.
Katkum ka jingong jong u, lada ïa ka jngïakajia pud ha Arunachal Pradesh lah ban pynbeit, balei yn ym lah ha Meghalaya. “Dei ban lah ha Meghalaya ruh. Ngin pyrshang ban weng ïa kane ka jingeh na ka bynta ki paidbah ba kin shong suk shongsaiñ,” u la bynrap.
