Shillong, Nailur 01: Ka National Peoples Party (NPP) ha ka sngi Thohdieng ka la rakhe kynmaw burom ïa ka lyngkhuh sngi kha kaba 76 snem jong u Purno A. Sangma uba long u nongseng ïa kane ka seng saiñpyrthei ha ka jylla.
U Myntri Rangbah ka jylla u Conrad Kongkal Sangma u la kyntu ïa ki paidbah ba kin bud ïa ki dienjat jong u kpa jong u, uba long uwei na ki riewsaiñpyrthei ba pawkhmat na kane ka thaiñ Shatei Lammihngi haduh mynta.
Haba kren ha ka 7th P A Sangma Memorial Lecture ba la pynlong da ka NEHU, Tura Campus bad ka P.A Sangma Foundation ha District Auditorium, Tura ban kynmaw burom ïa u Purno Sangma ha ka lyngkhuh sngi kha jong u, la sakhi lang da u Editor-in-Chief jong ka lad pathai khubor The Print, u Shekhar Gupta kum u nongai jingkren ba kyrpang.
“U Purno u la long u nonghikai, u nongïalam ba shisha uba la hikai ïa ngi bad uba la ïalam lynti ïa ngi (ki khun jong u) ban leh ïa kaei kaba ngi dei ban leh ha ka jingim, khamtam ha ka saiñpyrthei, kaba mut, ba ngi dei ban buh shwa ïa ki paidbah ha khmat bad ban pynthikna ba kano kano ka rai kaba ngi shim ka dei ban long na ka bynta ka jingbit jingbiang jong ki paidbah ka jylla bad na ka bynta ka ri,” ong u Sangma.
U la ong shuh shuh ba u PA Sangma u dei u briew uba ïohi jngai. U ba kren halor ki nongrim bad kum u Lamphang barim jong ka Lok Sabha, ka kyrteng jong u kan ïai sah kynmaw jurom.
“Ngi peit ïa ki mawnongrim, ngi peit ïa kane ka Auditorium ba la tei da ma u ha snem 1988, bad ngi kynmaw, ba dei u PA Sangma uba la shna. Kine ki dei tang ki jingtei lane ki bynta ba u la tei. Hynrei, ki nongrim bad ka saiñpyrkhat jong u kaba u don ka long ban noh synñiang sha u sup u thiar kaba u don na ka bynta ki briew jong ngi,” u la ong.
U la kyntu ïa ki paidbah khamtam ïa ki samla ba dang khie dang san ban tip shaphang ka jingim jong u PA Sangma ïa ki jinghikai bad ïa ki nongrim.
“Kiba bud ïa ki jinghikai jong u, kin kynmaw ïa u bad kin bud ïa ki dienjat jong u, ki dienjat ka jingieid ïa la ki jong ki briew, ha ki dienjat jong u, u ïai bat ïa la ka nongrim, bad uba buh shwa ïa ka ri hakhmat, ïa ki paidbah ha khmat. Nga ngeit ba kine ki dei kiba nongrim ki bym lah shuh ban mih bujli,” u la bynrap.
U Shekhar Gupta haba kren ha kane ka jingïalang u la ong, ba u PA Sangma u la khladnoh dang kloi na kane ka sla pyrthei bad ki dang bun ki kam kiba u dang dei ban leh na ka bynta ki paid riewlum ha ka ri India. U la pynkynmaw ruh ïa ka sien mynba u la wan ha kane ka thaiñ Shatei Lammihngi kum u nongthoh khubor ba dang khynnah ha ki snem 1980, bad ïathuh ruh ba u la leit jngoh kylleng ki jaka ha kane ka thaiñ bad ha Meghalaya hynrei wat tang shisien ruh um pat ju leit iuhkjat ha Garo Hills watla u la don ha Shillong.
“U dei uba paw, uba donbor, uba pawbha hapoh ka ri, bad ym pat don napdeng jong ngi ban ïohi ïa u PA Sangma kum u nongïalam jong ka thaiñ Shatei Lammihngi lane kum u nongïalam jong kawei ka jaidbynriew riewlum, u nongïalam jong ki Garo,” u la ong bad bynrap, ka jingkhladnoh jong u PA Sangma ka la long ka jingduh kaba khraw ym tang ïa ka Jylla Meghalaya hynrei ïa ka ri India baroh kawei.
