Shillong, Jylliew, 28: Hadien ba ka Khasi Hills Democratic Front hapoh ka jingialam jong u Bah Pyniaid Sing Syiem kum u Chief Executive Member ka la shimti ia ka Executive Committee kaba thymmai hapoh ka Khasi Hills Autonomous District Council na ka liang jong ka Khasi Students’ Union Central Body ha ka 28 tarik u Jylliew, 2023 ka la leit ban pynkynmaw biang ia ki mat jingdawa kiba ka seng ka la buh hakhmat ka Council naduh ki snem kiba mynshwa.
Ha ka jingiakren bad ki lad pathai khubor u President ka KSU samla Lambokstarwell Marngar u la iathuh ba ka jingpynkynmaw ia ka Council ka long halor ka jingpyrshah jong ka seng ban khlong ia u Uranium, ka jingpynsngew jong ka seng ban pyrshah ia ka jingai No Objection Certificate sha ki bor shipai jong ka sorkar India bad kawei pat ka jingpynkynmaw ia ka council ka long ba kam bit horkit hordang ban ai jingbit ban shna ia ka lynti rel katba ka sorkar India kam pat pyntreikam ia ka Inner Line Permit hapoh ka jylla Meghalaya.
Une u nongialam ka KSU u la maham ruh lada ka KHADC ka iaid lait ia kine ki jingdawa ka seng kam banse ban pynlong da ki jingiakhih kiba tyngeh.
