Shillong, Jylliew, 28: Da ki spah ngut ki dkhot jong ka Hynniewtrep Youths Council ha ka sngi balang ki la rah da ki plakad ha phyllaw jong ka State Convention Centre ban pyrshah ia ka Meghalaya Tourism Development Corporation Limited, kaba la pynjlan ia ka jingthungkam sa hynriew bnai ia u Puranjan Das kum u Chief General Manager jong ka Meghalaya Tourism Development Corporation Limited hadien ba u la shongthait na ka kam.
Ka seng ka la pynlong ia kane ka jingiakhih shwa ban sdang ka Board Meeting jong ka Meghalaya Tourism Development Corporation Limited ha State Convention Centre.
Na ka liang jong u Chairman ka Meghalaya Tourism Development Corporation Limited u Bah Sanbor Shullai bad u Managing Director u Bah Cyril V. Diengdoh kiba la khot iakren ia ki nongialam ka seng ki la pynpaw ba ka jingpynjlan ia ka jingshakri jong u Puranjan Das kum u Chief General Manager jong ka Meghalaya Tourism Development Corporation Limited ka dei namarba ka dang don ka Model Code of Conduct.
U General Secretary ka HYC u Bah Roy Kupar Synrem ha ka jingiakren bad ki lad pathai khubor u la iathuh ba ka seng kan ap tad haduh u bnai Nailar, 2023 ba ka Meghalaya Tourism Development Corporation Limited kan khot noh da ka Advertisement na ka bynta ka post u Chief General Manager kumba la kular da u Chairman jong ka Meghalaya Tourism Development Corporation Limited hynrei lada kane ka tnat treikam jong ka Sorkar kam kheinkor ia ki jingkular ka seng kam banse ban pynlong da ki jingiakhih kiba tyngeh.
