Shillong, Jylliew 07: Ka Kong Bindas Syiem ka longkmie na ka shnong Mawlong Nongtluh Ribhoi district kaba la don lai ngut ki khun, ka la pyneh beit triang ban weng noh ïa ka jingshah thngan kaba khlem pud sngi wat hadien ba u Executive Engineer ka tnat PWD (Roads) Nongpoh Division u la wan pynshai ha kaba ïadei bad ka jingkular jong ka Sorkar Jylla ban shna noh ïa ka surok Nongpoh-Umden-Sonapur.
Ha ka nongphai sngi ka sngi Thohdieng u Executive Engineer ka tnat PWD (Roads) Nongpoh Division da lade hi u la wan poi ha ka jaka shong shah thngan ka Kong Bindas Syiem ha Parking Lot, kaba don markhap bad ka ophis Additional Secretariat, Shillong.
U Executive Engineer ka tnat PWD (Roads) Nongpoh Division u la pynshai ha ka Kong Bindas ba ka Sorkar ka la pynkhreh ïa ka Detailed Project Report ha kaba ïadei bad ka jingpynkhreh na ka bynta ban shna ïa ka surok Nongpoh-Umden-Sonapur.
Hynrei ka Kong Bindas ka la pyneh beit triang da kaba ong, “ngan ym lah ban shu sangeh noh ïa ka jingshah thngan kumba nga ladep rai katba ngam pat ïoh ïa ka jingkular kaba biang na ka Sorkar ka ban pynthikna ba kan mang pisa na ka bynta ban shna noh ïa ka surok.”
Watla u Executive Engineer u la pynshai ba ka mang tyngka na ka bynta ban shna ïa ka surok yn sa ïoh, hynrei ka Kong Bindas ka la pynphai ktien da kaba ong, “nga la thait ban sngap ïa ka jingong ban sa ïoh shi ban sa ïoh. Kata ka dei ka jingshisha namarba da ki phew snem ngin sa ïoh beit, ïai shah beit. Kata ka kyntien ïaishah, kata ka kyntien ïai ap, na ka liang jong nga, ka la kdang nga la ngiah. Katba ngam pat ïoh ïa ka jingkular kaba thikna na ka liang jong nga ngan ym pat weng daleilei ruh em ïa ka jingshah thngan jong nga.”
U la pynpaw ruh ha ka Kong Bindas ba ynda ka tnat PWD (Road) ka la ïoh ïa ka jingmynjur un sa wan biang sha Shillong ban pyni ha ka khnang ba kan weng noh ïa ka jingshah thngan kaba ktah ïa ka koit ka khiah jong ka kum ka kynthei.
Hynrei ka Kong Bindas ka la phai ktien, “ym leilei Sir, na ka bynta ka jingbit jingbiang jong u paidbah, na ka bynta ka jingmyntoi jong u paidbah bad na ka bynta ka hok jong u paidbah, ym leilei, kumba nga ong lada ngan ïap hangne ruh ym leilei, kumba nga kwah ban ïoh ïa ka hok jong u paidbah.”
Ha ka jingïakren bad ki lad pathai khubor u Executive Engineer ka tnat PWD (Roads) Nongpoh Division u la ïathuh katkum ka jingong jong u Bah Prestone Tynsong uba long u Symbud Myntri Rangbah uba khmih ïa ka tnat PWD (Roads) ha shwa ka elekshon Lok Sabha ka treikam noh ka Model Code of Conduct (MCC) ka jingthmu ban shna ïa ka surok Nongpoh-Umden-Sonapur ka sahkut noh.
“Ïa ki kot ki sla ba ngi la ai ka la biang hynrei mynta ka shong sa tang ha ka jingai jingmynjur,” u la ong.
Shwa kane, hadien ba ka jingshah thngan jong ka Kong Bindas Syiem ka la kynjoh palat ïa ka 24 kynta ki doktor bad nos ki la poi ha ka jaka shah thngan ban thew ïa ka Blood Pressure bad ban peit thuh ïa ka jinglong jingman jong ka met jong ka Kong Bindas.
Ka Kong Bindas ka la sdang ïa ka jingshah thngan kaba khlem pud sngi naduh ka por 12:30 baje mynsngi ha ka sngi Palei bad kaba dang bteng kat haduh mynta ba la thoh ïa kane ka khubor ha ka por 10:00 baje mynmiet sngi Thohdieng.
Bun ki kynhun sengbhalang na them Ribhoi ki la wan sha nongbah Shillong ban leit ai mynsiem ïa ka Kong Bindas ha kane ka jingdawa ban dawa ïa ka Sorkar ba kan thaw ïa ki lad ki lynti ban pynïoh ïa ka mang pisa na ka bynta ban shna noh ïa ka surok Nongpoh-Umden-Sonapur.
