Mawkyrwat, Jymmang, 09: Ka Khasi Students Union (KSU) kaba peit ruh ia ka khia ka shon jong ki rangli ki juki, ha ka la pynshna da ka ing bapaka ia kawei ka riewkynthei ha ka shnong Rangbalang, South West Khasi Hills District ia kaba la aiti noh ha ka sngi Palei.
Kane ka riewkynthei ka dei ka Kong Angelina Sangriang kaba shong basah ha ka shnong Rangbalang Umsaitriew, South West Khasi Hills District bad kaba don arngut ki khun.
Ka Kong Anjelina nalor ba ka long ka briew kaba duk bad ka la shah iehbein ha la u jong u kurim bad ka la shong la sah tang ha iwei i ing ba la jot rathai bad ha ka por slap ka um ka rung shapoh ka ing. Namar ka jingshah iehnoh bein ha la u jong u kurim, kane ka riewkynthei ka la ioh ia ka jingpang ha ka bor jabieng.
Ki dkhot ka KSU hadien ba ki la lap ia kane ka longiing, da kawei ka jingmut ki la shim ia ka rai ban noh synniang ia kane ka long iing da kaba pynshna ia ka iing.
La shna ia ka ing kaba bha da ka jingshimti jong ka KSU Nobosophoh tad haduh ban da pyndep pura.
Ryngkat ka jingsakhi lang jong u Education Secretary ka KSU Sengkmie u samla Pynkmenlang Sanmiet uba la long kum u Kongsan, ha kane ka sngi ka seng ka la pynkup burom ia ki san ngut ki samla na ka shnong Rangbalang, kiba la pas bha ha ki eksamin bapher bapher da ka khusnam Maitshaphrang Award. Ka jingai khusnam ka long kum ka jingpynshlur ba kin nang leh bha shuh shuh ia ki jingpule ki jong ki.
La sakhi lang ha kane ka sngi da u President jong ka Hill Farmer Union u Bah Commander Shangpliang uba la long kum u Symbud Kongsan, u President ka KSU SWKHDU u samla Forwardman Nongrem, u President ka KSU Mawkyrwat Circle u samla Rutherford Lyngdoh, ki Sordar Shnong bad kiwei kiwei kiba la shah khot sngewbha.
