Shillong, Rymphang, 26: Namar ka jingiai kiew man la u snem jong ka jingpang HIV/AIDS hapoh ka jylla bad shi bynta ban pynsngewthuh paidbah, ka Meghalaya State AIDS Control Society, ha ka sien kaba 5 kan pynlong ia ka Red Fest lyngba ka North East Multimedia Campaign halor ka phang pdeng, North East United Against HIV/AIDS.
Ia kane ka Red Fest ka Meghalaya State AIDS Control Society yn sa pynlong ha Lariti Centre for Performing Arts, Shillong, Meghalaya ha ka 28 tarik mynta u bnai.
Ha ka jingkren bad ki lad pathai khubor ka Dr. B Cruise kaba dei ka project Director ka la ong ba ha kane ka Red Fest kin don haduh 2500 ngut ki nongia shim bynta ba kynthup naduh ki heh ophisar na ki tnad bapher bapher.
Na ka liang u Deputy Director u Bah Ajoy Lanong u la iathuh ba kumba 126 tylli ki district jong baroh ki jylla ka North East kin wan ban ia shim bynta ha kane ka Red Fest bad kin don ruh shibun ki kynhun tem bapher bapher ki ban wan ia shim bynta lang.
