Shillong, Rymphang, 26: Namar ka jingkhein sting bad khlem da burom lang shuh jong ki trai dukan kiba shong dukan ha Mawlong Hat ka la wanrah ia ka jingdheng kali kaba jur bha, ha kaba ki bus kiba wan na ki thain nongkyndong kim shym la ioh rung shuh sha Mawlong Hat Parking Lot, hynrei ki la hap ban pynieng noh sha Umshyrpi.
Halor kane, na ka liang ka ophis Shillong Municipal Board (SMB) ha ka 30 tarik u Kyllalyngkot, 2023 ka la pynmih ia ka rukom pyniaid kali thymmai ha Mawlong Hat Parking Lot ha kaba la bthah ia ka baroh ki trok ba ki dei ban mih noh ha ka por 9:99 baje mynstep hadien ba ki la dep ban pynhap ia ki mar ki mata.
Kaei kaba la jia ha ka step jong ka 26 tarik mynta u bnai, ki bus kim shym la iohrung satia sha ka jaka ba la pynbeit ba kin ieng, hynrei namar ka jingbym pynhap mar ki trok kine ki bus ki la hap ban ieng ha ka thain Angelee ter ter shaduh Them Iew Mawlong hynrei ki la shah beh noh ha ki Pulit.
Halor kane ki nongialam ka Khasi Hills Bazar Bus Association (KHBBA) tang shu ioh jingtip halor kane ka jingjia marmar ki la leit ban iakynduh ia u CEO jong ka Municipal bad kumjuh ruh ia u Superintendent of Poice (Traffic) ka East Khasi Hills bad na ka liang u CEO ka Municipal u la bthah ia ka Association ban pynbeit bad ki briew ba dei khmih jong ka tnad ba peit ia ka jaka ieng kali ha Iew Mawlong.
