Shillong, Nailur 29: Ka jingiakren pynbeit pud na ka bynta ka wat kaba ar hapdeng ka Sorkar Meghalaya bad ka Sorkar Assam ha ka kyrdan Myntri Rangbah kan sa long lashai ka sngi Saitjaiñ ha State Guest House, Khanapara, Guwahati, Assam. Kane ka jingialang kan sa long ha ka por 1:00 baje nohphai sngi.
Ka Sorkar Meghalaya bad ka Sorkar Assam ki la thung ia ki Regional Committee ki ban sor jamin ia ki hynriew tylli ki jaka kiba dang don hapdeng ka jingiakajia pud ha ka jingiapynbeit pud ha ka wat kaba ar.
Ha ka wat kaba nyngkong, ka Sorkar Meghalaya bad ka Sorkar Assam ki ladep iakren pynbeit ia ki hynriew tylli ki jaka ba don hapdeng ka jingiakajia pud, kiba kynthup ia ka Hahim, Gizang, Tarabari, Boklapara, Khanapara-Pilingkata bad ka Ratacherra.
U Myntri Rangbah ka Assam u Himanta Biswa Sarma bad u Myntri Rangbah ka Meghalaya u Conrad Kongkal Sangma ha ka 29 tarik Lber 2022, ki la iasoi ia ka dulir iasngewthuh jingmut hakhmat u Myntri ka tnat Kam Pohing ka Ri u Amit Shah ha New Delhi, ban pynkut noh ia ka jingiakajia pud kaba la neh jin haduh 50 snem kynthih hapdeng kine ki ar tylli ki jylla.
Sa hynriew tylli ki jaka kiba dang don hapdeng ka jingiakajia pud ki ban iakren pynbeit ha ka wat kaba ar ki long ka Langpih, Borduar, Nongwah-Mawtamur, Desh Doomreah, Block 1 & Block II bad ka Psiar-Khanduli.
Dang shen u Himanta Biswa Sarma uba la wan iuhkjat ha nongbah Shillong u la iakynduh kyrpang ia u Conrad Sangma tang hapoh shikynta ban iakren khyndiat na ka bynta ban buh ia ka sngi iakynduh halor kane ka jingthmu.
