Shillong, Jylliew 08: Ka Synjuk ki Rangbah Kur ka Bri u Hynñiewtrep ka la pynïar ïa ki shnat treikam da kaba pynïar tnat ha kylleng ka Bri u Hynniewtrep kynthup ha East Khasi Hills, West Khasi Hills South West Khasi Hills bad ha ka sngi Saitjaiñ la pynkha ïa kane ka shnat treikam ha Jaiñtia Hills.
Ha ka jingïalang kaba la long ha Ïalong Dorbar Hall la pynshai shaphang ka jingthmu jong ka Synjuk ban ïada ïa ki riti dustur tynrai ba la kren da u Bah Erwin K Syiem Sutnga bad u Bah Raphael Warjri. Hadien ka jingkren da kine ki rangbah la ïashim bynta ruh da kiwei kiwei ki rangbah na ka thaiñ ha kaba ki la kdew byllai ki jingeh ba ïa tyngkhuh ha ka imlang sahlang kiba la ktah shibun khamtam ha kaba la khynra ïa ki riti dustur tynrai da ki briew ba shim kabu ban myntoi lyngba ka khaii pateng bad kiwei kiwei ki jingmyntoi kum ki riewkum jong ka jylla.
Ka Synjuk ba la seng ha u snem 2019 mynba u Bah H.S Shylla u dang long u Chief Executive Member (CEM) jong ka Khasi Hills Autonomous District Council ka la maitphang ban buhti da ki atiar jong ka aiñ ban shna ki aiñ-rew kiba dei ban ïada ïa ka jaitbynriew. Haduh mynta kita ki aiñ-rew ki dang sahteng ha ka Sorkar Jylla bad khlem pat ïoh ka jingmynjur na u Lat ka jylla ban pynlong aiñ pura. Jar la katta ka jingpyrshang ka dang ïaid shitrhem shaphrang ban kyntu ïa ka Sorkar ban pynurlong ïa ka jingthrang jong ki paidbah ka jylla.
Ha kajuh ka rukom ki rangbah na rilum Jaiñtia ruh ki la ïa synrop lang ha kata ka jingthmu bad la rai synrop ban phah ki jynthoh sha ka Jaiñtia Hills Autonomous District Council (JHADC) na ka bynta ban pynlong aiñ noh kham kloi.
Ha kane ka jingïalang la jied ruh ïa ki nongkitkam jong ka Synjuk ki Rangbah Kur ka Bri u Hynñtrep kaba la jer da ka Dorbar ki Waheh Kur Ri Jaiñtia.
Ki nongkitkam ki long u Bah Khroo Lamsalanki Pariat kum u President, Bah Pyrkhat Shylla bad Bah D Donstan Khonglah kum ki Vice President, Bah Hamkhian Dkhar kum u General Secretary, Bah Gremalin H Bareh kum u Assistant Secretary, Bah Abutt Nelson Muksor kum u Treasurer, Bah Standbyme Sari kum u Media Secretary bad baoh ki rangbah kum ki longsan mansan ha ka Dorbar Nongkitkam kiba dei artat ki khlieh rangbah jong ki kur lajong ha la ki thaiñ.
Shuh shuh ka Synjuk ka la pynkhreh ruh ban ïashem bad ki Rangbah Kur na ka thaiñ Ri Bhoi ha ka 11 tarik mynta u bnai ha Shillong na ka bynta ban pynkha sa ïa ka shnat ha Ri Bhoi.
Khyndiat bnai mynshwa ka la don ka jingïasyllok bad ki Rangbah Kur na Ri Bhoi na ka bynta kane bad la khmih lynti ba yn sa urlong noh kloi lan khamtam ba la thmu ban pynlong ïa ka Dorbar Pyllun ha u bnai Nailar 2024.
Na ka liang ka shnat na Jaiñtia Hills la pynkhreh ban pynskhem ha ka 27 tarik mynta u bnai ynda la pynbiang da ki nongkitkam thymmai.
