Shillong, Jylliew, 08: Ka Hynñiewtrep Youths Council (HYC) Seng Kmie ba la lamkhmat da u General Secretary Bah Isaac Basaïawmoit ha ka sngi Thohdieng ka la bteng ban khynra bad ban kem ïa ki nongdih drok naduh ka por 7:00 baje mynmiet ha Ïewduh bad Motphran ter ter shaduh Bhoi Stand.
Ha kane ka jingkhynra, ki dkhot ka seng ki la ïoh bat kumba 12 ngut ki nongdih drok bad na ka met jong kine ki nongdih drok ka seng ka la ïoh kurup ïa ki thyrnia injek bad ïa u drok.
Hadien ba ladep kurup ïa ki thyrnia injek bad ïa u drok, kumba ju leh manla ka por ka seng ka la sneng bad ka la kyntu kynpham ïa kine ki samla ba kin kiar noh na kane ka jingim kyrni ha u drok bad ha kajuh ka por la phah wan mih ruh ïa ki sha ka ophis treikam jong ka seng ryngkat bad ki kmie ki kpa.
Ki dkhot ka seng ki la thang pynjulor ruh ïa ki thyrnia injek bad ïa u drok da ka ding.
U Bah Isaac u la ong ba ka seng kan sa nang ïai bteng ka jingkhynra ïa ki nongdih drok wat hapdeng ki jingtynjuh kiba bun.
