Shillong, Nailar, 14: Ha ka sien kaba nyngkong eh ki nongialam jong ka seng kieng atiar Hynñiewtrep National Liberation Council (HNLC) ba la shah kheiñ be-aiñ ha ka Sorkar kiba la wan iuhkjat sha ka Jylla Meghalaya na ka bynta ka jingïakren iasuk bad ka Sorkar ki la iohlad ban rakhe ia ka sngikha kaba 36 snem jong ka seng ne ka Raising Day ha ka Lah Sngi u Blei ha ka jaka sah ka jong ki ha Inspection Bungalow (IB) jong ka MeECL, Ribhoi District.
Ha ka khyllipmat ba la pynher ia ka lama jong ka seng, ki nongialam ki la rwai ruh ia ka jingrwai ieid ri, ‘Ri Khasi, Ri Khasi’ bad shim ruh ia ka salute da ka jingialam jong u Vice Chairman ka seng u Bah Manbhalang Jyrwa, u Political Secretary u Bah Aristorwell Thongni, u Foreign Secretary u Bah Phangkupar Diengdoh, ki arngut ki PSO kiba kynthup ia u Bah Storgy Lyngdoh bad u Bah Aiborlang Marbaniang.
Ha kane ka sngi la sakhi lang da ki nongialam jong ka Hynñiewtrep National Youth Front (HNYF) ba kynthup ia u Bah Sadon Blah uba long u ksiang jong ka Seng HNLC ban iakren iasuk bad ka Sorkar.
Kum ban shu pyntip hangne, ki nongialam ka seng, ha ka sngi u Blei kim shym la pynsngap wat ia ka jingpyrkhing jong ka Sorkar hynrei ki la leit ban buh syntiew ha u lum jingtep jong u General Secretary barim jong ka seng u Bah Cherish Starfield Thangkiew ha Lawmali ha ryngkat ka jingsakhi lang jong ki bahaing hasem bad ki dkhot jong ki seng bapher bapher bad aiti ruh ia ka lama jong ka seng sha ki bahaing hasem.
